نن تر دېرشو ډېر افغان سیاستوال او د سیاسي ګوندونو استازي په مسکو کې له طالبانو سره ګډه غونډه کوي. طالبانو هم منلې چې غونډې ته به یې د شیرمحمد عباس ستانکزي په مشرۍ، لس کسیزی پلاوی ورځي او له افغان سیاستوال سره به پر سوله او د افغانستان پر راتلونکي خبرې کوي. دې غونډې ته له کابله ورتلونکو کسانو هم په یوه ګډه اعلامیه کې پرون ویلي وو چې دوی به له طالبانو سره خبرې وکړي، خو د نظام پایښت، د امنیتي ځواکونو دوام او ملي ګټې ورته سرې کرښې دي او په دې تړاو له چا سره معامله نه کوي.
مسکو ته ورغلي کسان تر ډېره د وسله والو طالبانو اصلي مخالفین دي. که څه هم په دوی کې بې طرفه او طالب پلوي کسان هم شته، خو ډېری هغه کسان ورغلي چې له طالبانو سره له ۲۰۰۱ ز کال وړاندې هم جنګېدلي دي او له ۲۰۰۱ ز کال را وروسته یې هم د اوسني نظام بنسټ اېښی، دوی له طالبانو سره جنګېدلي دي او تل یې د هغوی مخالفت کړی دی. په دې سره په مسکو کې طالبان له خپلو سرسختو او اصلي مخالفینو سره مخ کېږي. په واقعیت کې له بهرنیانو پرته دا د جګړې اصلي لوري دي چې اوږدې دښمنۍ یې افغانستان دغه حالت ته را رسولی دی. اوس چې دا پاخه دښمنان سره کېني، دا یو مثبت پرمختګ دی. هغوی چې تر پرونه پورې یې یو بل وژل او اوږده جګړه یې وکړه، اوس فکر کوي چې کولی شي خپلې ستونزې د خبرو له لارې حل کړي او په همدې خاطر ګډه غونډه کوي. دا ښيي چې د سولې لپاره له ټولو اړخونو تمایلات زیات شوي دي. په دې غونډه کې به اختلافات وي، طالبان به خپل دریځ تکراروي او بل لوری به پر خپل دریځ ټینګار کوي، خو له شک پرته داسې مسایل به هم پیدا شي چې دواړه لوري پرې توافق ولري. دا توافق پراخېدلی شي او ورو ورور پر هغو مسایلو هم توافق کېدلی شي چې اوس پرې اختلاف دی.
د سولې لپاره له هره اړخه هڅې باید چټکې شي، ځکه چې که موږ خپله د سولې هڅې ونه کړو، نو د سولې په نامه به یوه بهرنۍ لوبه را باندې وتپل شي. امریکا غواړي په افغانستان کې یو بدلون راولي او له همدې امله د امریکا ولسمشر پرون یو ځل بیا ټینګار کړی چې ځواکونه به له افغانستان څخه وباسي او یوازې په څارګرۍ به تکیه کوي. نو چې امریکا بدلون راولي او پلان لري، زموږ لپاره اړینه ده چې موږ هم د داسې بدلون هڅه وکړو چې پایله یې سوله شي او افغانستان له روانې جګړې و ایستل شي. د مسکو وروستۍ ناسته همداسې یوه هڅه ده چې باید ملاتړ یې وشي. له دې غونډې سره د ارګ چلند ناسم او د افغانستان په ګټه نه دی، خو پرون اجرایه ریاست بیا ښه دریځ غوره کړ او تمه یې وښوده چې دا غونډه به مثبتې پایلې ولري. له همدې امله د دې غونډې د ملاتړ له لارې موږ کولی شو د افغانانو خپلمنځي تفاهمات زیات کړو او ښايي دا د حکومت او مخالفینو ترمنځ خبرو ته هم زمینه برابره کړي.
