په مسکو کې پرون افغان سیاستوال او د سیاسي ګوندونو استازي له طالب استازو سره مخامخ جرګه شول. په غونډه کې پخواني ولسمشر حامد کرزي، شیرمحمد عباس ستانکزي، یونس قانوني، محمد محقق، عطامحمد نور او نورو سیاستوالو خبرې وکړې. د غونډې لومړۍ ورځ او ویناوې تر ډېره مثبتې وې. پخواني ولسمشر حامد کرزي په زړه پورې خبرې وکړې او ښکېل لوري یې سولې ته را وبلل. د طالبانو دریځ د پخوا په پرتله نرم و. د نورو ویناوالو ویناوې هم نرمې او له مثبتو پیغامونو ډکې وي.
موږ باید تمه ونه لرو چې هېڅ ستونزه دې نه وي او په لومړۍ ورځ دې هر څه سم وي. د طالبانو په دریځ کې نرموالی و، ډېر مثبت پیغامونه یې ورکړل، ډېر ګونګ مسایل یې روښانه کړل، خو بیا هم ستونزې شته. که څوک دا تمه کوي چې طالبان دې هر څه ومني او په لومړۍ ورځ دې یې دریځ یو سلو اتیا درجې بدل شي، دا ناشونې ده او هېڅکله به هم ونه شي. همداسې د طالبانو د سرسختو مخالفینو په ویناوو کې هم نرموالی و، طالبانو ته یې د پخوا خلاف نرم او له درناوي ډک کلمات وکارول او جوړجاړي ته یې له خپله اړخه شنه څراغونه ورکړل. د دوی په خبرو کې هم داسې خبرې وې چې باید بدلې شي او مثبت بدلون پکې راشي.
مهمه دا ده چې لومړۍ ورځ ښه پیل شوه او له هره اړخه مثبت پیغامونه ورکړل شول. پرون ښکاره شوه چې بدلونونه پیل شوي، ښکېل لوري غواړي جوړجاړی وکړي او له خپله اړخه ځینو قربانیو ته هم تیار دي. دا یو ستر پرمختګ دی، دا ستر مخالفین چې د وسلې په ژبه یې خبرې کړې دي، سره مخ شول. دوی به خبرې وکړي، بحثونه به وکړي، نظریات به تبادله کړي، پر ځینو مسایلو به توافق وکړي، مشترک ټکي به را پیدا شي. دغه راز د مخالفت ټکي او بحثونه به هم روښانه شي او وروسته به پرې د جوړجاړي لپاره لا زیات فکر او کار وشي.
ښکېلو لورو پرون ځینې داسې مسایل مطرح کړل چې د طالبانو، جمعیت، وحدت، یا بل سیاسي ګوند او ډلې نظریات وو، خو ډېر داسې مسایل هم یاد او مطرح شول چې خلکو یې غوښتنه کوله او یا هم خلکو یې په اړه اندېښنې لري. ځینې مسایل طالبانو خپله واضح کړل او ځینې داسې وو چې نورو ویناوالو یې په اړه واضحې خبرې وکړې. د بنسټونو او نظام پایښت، پر ملي ګټو او سترو ارزښتونو نه معامله، د هېواد خپلواکي او داسې نور مسایل وو چې په روښانه ټکو کې مطرح شول.
په ټوله کې د غونډې لومړۍ ورځ مثبته وه او خلکو ته یې هیلې پیدا کړې دي چې دا ډول غونډې به سولې ته د رسېدو لاره اسانه کړي. په لومړۍ ورځ ویناوې په ژوندۍ بڼه خپرېدلې، نو ځکه به ځینو مسایلو پر ویناوو اغېز درلود، خو هغه څه چې په دویمه ورځ ویل کېږي او یا هم په رسنیو کې نه خپرېږي، هغه به د سولې او جوړجاړي چانس لا زیات کړي. د افغانستان خلک تمه لري چې دا او نورې وروستۍ هڅې به یې له جګړې خلاص کړي او سولې ته به یې ورسوي.
