د افغانستان د سولې لپاره د امریکا د بهرنیو چارو ځانګړي استازي زلمي خلیلزاد ویلي، دوی هڅې کوي چې تر افغان ولسمشریزو ټاکنو وړاندې له طالبانو سره هوکړې ته ورسېږي او یا هم په دې برخه کې مهم پرمختګونه وکړي. خلیلزاد دغه راز ویلي چې هڅه کوي له طالبانو سره د سولې هوکړې ته ورسېږي، نه د بهرنیو ځواکونو د وتلو هوکړې ته. نوموړي پر طالبانو یو ځل بیا نیوکه کړې او دا یې بې پروايي ګڼلې چې له افغان حکومت سره خبرو ته نه کېني.
داسې ښکاري چې لا هم د ځواکونو د وتلو په تړاو په امریکايي دریځ کې ابهام دی. ټرمپ، خلیلزاد او نور امریکايي چارواکي په دې تړاو متفاوتې خبرې کوي. ښايي امریکا له طالبانو سره په روانو خبرو کې په دې تړاو وضاحت ورکړی وي، خو ښکاري چې امریکا یا غواړي ابهام رامنځ ته کړي او یا هم د ځواکونو د وتلو په تړاو ثابت دریځ نه لري. اوس چې د طالبانو او امریکا ګډې کمېټې چې پر ځینو مسایلو به ګډ کار کوي او یوه طرحه به د فبرورۍ په ۲۵مه په دوحه کې د طالبانو او امریکايي استازو ګډې غونډې ته راوړي، نو ښايي دا مسئله پکې د یو خنډ په توګه پاتې وي. که څه هم طالبانو ویلي چې امریکايي لوري د ځواکونو وتل منلي دي، خو د امریکايي چارواکو وروستۍ خبرې بیا هم بدلې شوې ښکاري.
له بله اړخه دا ښه خبره ده چې د سولې په چاره کې تر ټاکنو وړاندې باید یوه هوکړه وشي، خو د افغان ستونزې پېچلو اړخونو ته په پام سره عملي نه ښکاري. ښايي پرمختګونه وشي او مهم پرمختګونه وشي، خو د هوکړې شونتیا کمه ده. دا چې خلیلزاد تر ټاکنو وړاندې پر هوکړې ټینګار کوي، غواړي وښيي چې دوی د ټاکنو د ځنډولو او موقت یا انتقالي حکومت پلان نه لري. خلیلزاد د افغان حکومت او بیا په ځانګړي ډول د اشرف غني له اړخه غبرګونونه او په دې تړاو حساسیتونه درک کوي، نو ځکه نه غواړي چې د ټاکنو د ځنډ بحث وکړي. که یو طرف ته تر ټاکنو وړاندې د سولې هوکړه ناشونې وي او بل لور ته ټاکنې سولې ته خنډ جوړ کړي، نو امریکا به د ټاکنو له ځنډولو پرته بل انتخاب ونه لري. دغه راز د موقت او انتقالي حکومتونو بحث هم له بیا بیا ردولو سره سره لا هم مهم دی او ویل کېږي چې په دې تړاو د خلیلزاد او طالبانو ترمنځ بحثونه هم شوي چې دواړه لوري یې پټ ساتي.
د افغانستان خلک که ټاکنې غواړي او که سوله، هدف یې دا دی چې په ژوند کې یې مثبت بدلون راشي. دا روښانه ده چې سوله لومړیتوب دی او ټاکنې یې هېڅلکه بدیل نه شي کېدلی، خو غواړي پوه شي چې د ټاکنو ځنډول او یا د موقت حکومت بحث به د سولې له چارې سره مرسته کوي او که نه. که سوله کېږي او واقعي سوله کېږي، نو افغانان یې له هرې لارې ملاتړ کوي او په دې برخه کې به چاته اجازه ور نه کړي چې خنډ جوړ کړي.
