د هغو فرصتونو پېژندل چې په تاسې پورې اړه لري، ستاسې لپاره ښه خبره ده، خو که ونه غواړی یا ونه توانېږی چې له هغه استفاده وکړی، څه ګټه یا توان به وکړی؟
دا هم پر ځای خبره ده چې ټول فرصتونه د تعقیب او څار ارزښت نه لري. باوري یم چې ریچارد برانسون به هم له ټولو هغو فرصتونو چې ده لرل، استفاده نه وي کړې یا به یې نه غوښتل چې له هغه استفاده وکړي. خو هر وخت موږ ته داسې فرصتونه په لاس راځي چې باید استفاده ترې وکړو او دا ټول زموږ په کړو وړو پورې تړوا لري چې باید خپله ورته ځان اماده کړو.
غواړو په همدې مقاله کې هغه لارې چارې در وښيو چې پر مټ یې له خپلو فرصتونو په استفادې، خپلو موخو او هیلو ته ورسېږی:
۱ـ یوازې تر خپلې خوشحالۍ پورې تړلي مه پاتې کېږئ ډېری هغه فرصتونه چې په تاسې پوره اړه لري، تاسې په بېلابېلو لار ننګوي، مانا دا چې تاسې به له خپلې ورځنۍ خوشحالۍ تېرېږی او د دغه کار(له خپلې ورځنۍ خوشحالۍ تېرېدل) لپاره به ځان اماده کوی، څو بیا وکولای شی له هغو فرصتونو چې په تاسې پورې اړوندېږي، استفاده وکړی. (تاسې ډېر وخت د فرصتونو له ګټې اخیستنې لرې پاتې شوی یاست او له همدې سره مو عادت کړی، ځکه خو پکې خوشحاله هم یاست، کله چې تاسې له فرصتونو سمه استفاده کوی، دا بیا له خپلې خوشحالۍ تېرېدل درته ښکاري. ژباړن)
باید له هرڅه مخکې د وېرې له کوټې راووځئ، مانا دا چې هغه خطرونه ومنی چې تاسې خپلو موخو او هیلو ته د رسېدو پر لار ترې وېرېږی. داهره یوه وېره خپلې بدۍ لري، تاسې هغه پایله چې د دغه وېرې له قبلولو وروسته به یې لاسته رواړی، د هغه له بدۍ سره پرتله کړئ او بیا پرېکړه وکړئ چې سرته یې ورسوی او که نه.
۲- کوچني فرصتونه هم ارزښت لري
باید په یاد ولری چې ټول فرصتونه یو شان ارزښت نه لري. د فرصت کچه مهمه نه ده، بلکې هغه پایله یا نتیجه چې تاسې یې له هغه څخه لاسته راوړی، تر ټولو مهمه ده.
نو پر دې اساس باید تاسې هېڅکله هغه پایلې چې فرصتونه یې تاسې ته په لاس درکوي، بې ځایه ونه ګنئ. څوک پوهېږي، کېدای شي ډېر واړه فرصتونه تاسې ته لویو موخو ته د رسېدو لپاره بهانه شي. ښه خبره دا ده چې په ټوله انرژۍ او توان مو له هغو ټولو فرصتونو چې ستاسې په بریا کې یې ونډه ډېره او مهمه ده، په ښه ډول استفاده وکړئ.
۳- له نوښتګرو خلکو سره اړیکه ولرئ
«له ټولو سره اړیکه» ایا نن ورځ یو څوک دومره وخت لري چې له هرچا سره اړیکه ولري یا دغه کار کولای شي؟ د دې پرځای له هغو نوښتګرو او رښتینو کسانو سره اړیکه ټینګه کړئ، چې له تجربو، پوهې، اړیکو او مهارتونو یې د خپلو موخو په لاسته راوړلو کې استفاده کولای شی. په دې پسې مه ځی چې ډېر ملګري ولری، بلکې د ملګرو په ارزښت او عادتونو پسې لاړ شئ.
له دې هرڅه سربېره، له هغو کسانو سره اړیکه لرل چې موخو ته د رسېدو پر نویو لارو چارو فکر کوي او پر پخوانیو نه ځي، تاسې ننګوي او بالاخره سیالۍ او رقابت ته مو هڅوي، څو تاسې هم خپلو موخو او هیلو ته له نویو او اسانه لارو ځانونه ورسوی.
۴- ځینې هغه څیزونه چې باید لرې تر و اوسئ
که غواړی له هغو فرصتونو چې په تاسې پورې اړه لري، په سم ډول استفاده وکړی، ښه ده چې له دغو کارونو یو هم ونه کړی:
په تېرو یادونو کې پاتې کېدل
د امکاناتو برابرېدو انتظار کول
د فرصتونو په تمه پاتې کېدل
له تېروتنې او ناکامۍ وېرېدل
کینه او شک کول.
په تېرو یادونو کې پاتې کېدل تاسې د لارې په منځ کې پرېږدي، که ریچارد برانسون د تېر وخت په یاد کې پاتې وی، ایا هغه به میلیاردر شوی وی؟ د فرصتونو په تمه پاتې کېدل، لکه د بخت ازمویل داسې دي، ممکن هغه څه چې تاسې یې غواړی، پېښ شي، خو په سلو کې ۹۹ سلنه هېڅ وخت دا نه پېښېږي، دا خبره ښه په خلاصو غوږونو واورئ.
موږ ټول له وېرو سره مخ کېږو، خو هغه وخت چې یو څه په ټوله مانا غواړی او د هغه لپاره جنګېږی، باید هغه وخت ټوله وېره شاته واچوی، ځکه دا فرصت بل هېڅ وخت تاسې ته په لاس نه درځي. ژوند هېچا ته هم دویم چانس په لاس نه ورکوي.
۵- لوی فکر وکړئ
له فرصتونو سره د مخ کېدو په صورت کې، لنډ او محدود فکر کول، یوازې له هغو شرایطو چې ستاسې لپاره اماده شوي، د ګټې اخیستنې کچه مو محدودوي. د دغه څه په بدل کې باید لوی فکر وکړئ. د هر هغه فرصت په مقابل کې چې ستاسې مخ ته راځي، لوی او مثبت فکر وکړئ. باید پوه شی چې له هغه فرصته لاسته راغلې برخه ستاسې په تلاش پورې اړه لري.
۶- اقدام وکړئ
کله مو چې فرصت تر لاسه کړ، ډېر ژر له ځان سره فکر وکړئ، چې ایا د وخت په تېرېدو سره به یې بیا لاسته راوړی او که نه؟ که مو فرصت له لاسه ورکاوه، هرڅومره ژر چې کېږي ولو که هرڅومره لږ هم وي، خو له هغه استفاده وکړئ.
همدا وخت مو باید له هغه څخه د لاسته راوړونکو پایلو اغېز وسنجوئ او له فعلي شرایطو سره داسې لاس پکار شی چې له تاسې سره هیلو ته په رسېدو کې مرسته وکړي.
که مو مخ ته راغلی فرصت ډېر په زړه برابر وي، پام مو وي چې پرته د هغه د پایلو له سنجولو یې لاس په کار نه شی، ځکه ډېر وخت د پایلو له سنجولو پرته لاس په کار کېدل، د سړي د توقع خلاف پایلې لري.
لومړی یې پایلې وسنجوئ او بیا وروسته د عمل لپاره اقدام وکړئ.
