د نړۍ د بقا لپاره منځني ختیځ کې ژر تر ژره سولې ته رسېدل ضروري دي

د منځني ختیځ روانه جګړه د بشریت د راتلونکي لپاره یو خطرناک ګواښ دی، چې که ژر تر ژره پر سوله بدله نشي، نو ټوله نړۍ به د ناورینونو تر سیوري لاندې راولي. په دې جګړه کې نه یوازې سیمه ییز خلک اغیزمن شوي، بلکې نړیوال نظم هم د ګډوډۍ سره مخ شوی دی. بې شمېره انسانان خپل ژوند له لاسه ورکوي، او اقتصادونه ورځ تر بلې ضعیفېږي. د دې جګړې دوام به د نړیوالې سولې هڅې له ستر ګواښ سره مخ کړي، چې اغیزې به یې زمونږ په هېواد افغانستان هم په وضاحت سره احساس شي.
افغانستان، چې په خپله د جګړو اوږد تاریخ لري، د سولې ارزښت ډېر ښه درک کړی. د جګړې هره شېبه، چې په هره سیمه کې وي، زموږ په هېواد کې د خلکو لپاره یو ناوړه اغیز لري. افغانان چې د جګړو له اوږدې مودې بدبختیو تازه را وتلي اوس په دې هڅه کې دي چې خپلې سیمې بیا ورغوي، غواړي چې نړیواله ټولنه هم د جګړې پر ځای سولې ته ترجیح ورکړي. د جګړې اوږدېدل د سیمې او نړۍ لپاره یو ستر خطر دی، چې په نتیجه کې به یې ټول هیوادونه متضرر شي.
په اوسني وخت کې، نړیواله ټولنه باید سمدستي اقدام وکړي ترڅو د اسرايیل،فلسطین ،‌لبنان او ایران جګړه پای ته ورسوي او د سیمې او نړۍ لپاره د سولې یوه نوې لاره هواره کړي. دا یوازې په منځني ختیځ کې د سیمې ستونزه نه ده؛ دا د ټولې نړۍ ګډه مسله ده. ځکه منځنی ختیځ د انرژۍ او اقتصاد لپاره یو ستر مرکز دی، او هلته جګړه به په نړیوالو بازارونو کې ستر اغیز ولري، چې په نتیجه کې به یې د ډېرو هېوادونو اقتصادونه زیانمن شي.
افغانستان هم د دې جګړې د دوام له خطر سره مخ دی. که جګړه همداسې دوام وکړي، نو زمونږ په سیمه کې د ثبات او سولې د هڅو مخه به ډب شي، او د نورو سیمو په څېر به افغانان هم په دې کړکیچ کې ښکېل شي. افغانان چې له جګړې ستړي دي، نور د وینو توییدل نشي زغملی. په همدې خاطر، مونږ له نړیوالې ټولنې څخه غواړو چې په ګډه کار وکړي ترڅو منځني ختیځ ته سوله راشي او دا سیمه له نورې تباهۍ څخه وژغوري.
د نړیوال نظم او سولې د بقا لپاره اړینه ده چې د جګړې پر ځای سولې ته کار وشي. د دې لپاره، نړیوالې ادارې، ملګري ملتونه، او نړیوال ځواکونه باید د جګړې د پای ته رسولو لپاره د خپلو ټولو وسایلو څخه کار واخلي. د منځني ختیځ کړکیچ یو داسې حالت ته رسېدلی چې که حل نشي، نو نړیواله ټولنه به له لوی بحران سره مخ شي. جګړې د بشریت لپاره هېڅ حل نلري، بلکې سوله او مذاکرات هغه لارې دي چې نړۍ ته به یو ښه راتلونکی ورکړي.
د منځني ختیځ جګړه، که ژر تر ژره حل نشي، د سیمې او نړۍ لپاره به تر ټولو ستر ګواښ وګرځي. مونږ ټولو ته په کار ده چې د سولې د راوستلو لپاره هلې ځلې وکړو او جګړه ختمه کړو. نړۍ نور د جګړو توان نلري، او د بشریت راتلونکی په جګړو کې نشي خوندي کېدای. همدا اوس وخت دی چې نړۍ د سولې پر لور ګام واخلي او د یو بل لپاره یو سوله‌ییز ژوند برابر کړي.