کابل کې د ودانیو جوړولو برخه کې د نړیوالو معیارونو رعایت ته اړتیا

په افغانستان کې د ودانیو جوړولو چټک پرمختګ له یو لوري د خوښۍ او د بل لوري د اندیښنې وړ دی. په ځانګړې توګه په کابل ښار کې د ودانیو جوړونې فعالیتونه په بې ساري ډول زیات شوي، خو د نړیوالو ستندردونو او ساختماني معیارونو په پام کې نیولو کې جدي نیمګړتیاوې لیدل کیږي. دا حالت نه یوازې د ښاري ښکلا لپاره ستونزې راولاړوي، بلکې د خلکو د ژوند خوندیتوب او د ښار راتلونکي پرمختګ ته هم جدي ګواښ پېښوي.
د ودانیو جوړونې په برخه کې د نړیوالو ستندردونو نه مراعاتول په کابل کې یو عامه چلند ګرځېدلی دی. ګڼ شمېر ودانۍ د اړتیا وړ ساختماني موادو د کمښت، د انجینري سمو اصولو د نه پلي کېدو او د تخنیکي کارپوهانو د نه شتون له امله له لومړنیو معیارونو څخه لاندې جوړې شوې دي. دا حالت کولی شي په نږدې راتلونکي کې د جدي زیانونو او احتمالي ناورینونو لامل شي.
افغان سرپرست حکومت په ځانګړې توګه کابل ښاروالۍ ته اړینه ده چې د ودانیو جوړونې د پروژو څارنې ته ځانګړې پاملرنه وکړي. ټول هغه مهم ساختماني اصول او نړیوال معیارونه چې د ودانیو د جوړولو لپاره وضع شوي دي، باید په جدي ډول رعایت شي. د ساختماني موادو کیفیت، د ودانیو د بنسټ ټینګښت، د تخنیکي انجینرانو استخدام او د رسمي جوازونو ورکول باید د ښاروالۍ له خوا په منظمه توګه وڅارل شي.
په دې برخه کې د ودانیو د جوړولو جوازونو ورکول باید د مسلکي انجینرانو د تایید او تخنیکي ارزونو پر بنسټ وي. د ودانیو څارونکي ټیمونه باید په منظم ډول ساختماني پروژې وڅاري او د نړیوالو ساختماني معیارونو د نه مراعات کولو په صورت کې سختې قانوني سزاګانې ورکړل شي. همدارنګه، د عامه پوهاوي کمپاینونه هم اړین دي چې د ښار اوسېدونکو ته د معیاري ودانیو ارزښت او د غیر معیاري ودانیو د خطرونو په اړه معلومات ورکړي.
که د کابل ښار په شمول د افغانستان په ټولو لویو ښارونو کې د ودانیو د جوړولو لپاره معیاري چوکاټونه وضع او په جدي ډول پلي شي، نو نه یوازې د ښاري ژوند کیفیت به ښه شي، بلکې د احتمالي ناورینونو او زیانونو مخه به هم ونیول شي. د ښار راتلونکی پرمختګ د جدي څارنې او د نړیوالو ستندردونو رعایت ته اړتیا لري، چې د حکومت او ښاري ادارو جدي پاملرنه غواړي.
په پای کې، د ښاري پراختیا لپاره د حکومت او خلکو ترمنځ د ښې همغږۍ رامنځته کول هم اړین دي. د ودانیو د جوړولو فعالیتونه باید د قانون په چوکاټ کې تنظیم شي او له غیر معیاري ودانیو څخه باید د ښار د خوندیتوب لپاره جدي مخنیوی وشي.