پاکستاني چارواکي بیا بیا وايي چې د افغان سولې روانه پروسه د دوی په مرسته او همکارۍ مخ ته ځي. دوی دغه راز ویلي چې له همدې امله امریکا ترې خوشاله ده او اوس پر پاکستان له دې امله نیوکې نه کوي. د امریکا ځانګړي استازي زلمي خلیلزاد هم ویلي چې د سولې په پروسه کې د پاکستان رول مهم او هڅه کوي چې مثبت رول ولوبوي. له بله اړخه افغان حکومت د پاکستان په اړه تونده ژبه کاروي. د دې ترڅنګ پخواني ولسمشر حامد کرزي هم د پاکستان پر رول نیوکې کړې دي او ویلي یې دي چې افغانان نه غواړي د سولې تر نامه لاندې افغانستان د پاکستان تر نفوذ لاندې راشي.
دا روښانه ده چې پاکستان د سولې په روانو خبرو کې دخیل دی او په دې برخه کې مرسته او مزاحمتونه دواړه یو ځای کوي. له بنده د ملا برادر خوشې کول، ځینو غونډو ته د طالب استازو د سفر زمینه برابرول او ځینې نور مسایل یې مرستې یادولی شو، خو مزاحمتونه یې هم څرګند دي. د طالبانو ځینو مرکچیانو ته لا هم پاکستان اجازه نه ورکوي، چې قطر ته ولاړ شي چې ښه بېلګه یې ملا برادر دی.
پر همدې اساس ویلی شو چې پاکستان د امریکا تر فشار لاندې دی او له همدې امله همکاري کوي، خو پاکستان بیا بیا هڅه کوي چې په دې پروسه کې امتیاز تر لاسه کړي. د امریکا له خوا پاکستان ته د امتیازاتو د ورکړې خبره شوې ده، خو دا چې په افغانستان کې څه ورکول کېږي، لا معلومه نه ده. پاکستان د سولې په پروسه کې هغه وخت همکاري کوي چې ډاډه شي، د نورو امتیازاتو ترڅنګ په افغانستان کې هم خپلو اهدافو ته رسېږي. که پاکستان خپلو ټولو اهدافو ته ونه رسېږي، ځینې مهم اهداف باید تر لاسه کړي چې په بدل کې یې د سولې په برخه کې همکاري وکړي. که پاکستان ته هېڅ ور نه کړل شي او هغه څه تر لاسه نه کړي چې په افغانستان کې یې غواړي، نو د سولې په پروسه کې به همکاري ونه کړي.
د سولې په روانو خبرو کې د افغانانو ستره اندېښنه همدا ده، چې په دې لوبه کې پاکستان ته څه ورکول کېږي، پاکستان څه کوي او د پاکستان رول څه دی. په افغانستان کې خلک درک کوي چې سوله د پاکستان له مرستې پرته سخته ده، خو دا هم درک کوي چې پاکستان هېڅکله نه غواړي افغانستان ته سوله او ثبات را وګرځي او که دا کار غواړي هم، نو په بدل کې یې ډېر امتیازات باید تر لاسه کړي. له همدې امله د پاکستان پر رول او اهدافو شکونه شته.
د افغانستان حکومت او سیاستوالو ته پکار ده چې په دې چاره کې جدي و اوسي. دوی باید امریکا، طالبانو او نورو لورو ته واضح پیغام ورکړي، چې دوی به په افغانستان کې د پاکستان د نامشروعو ګټو پر وړاندې ودرېږي او پرې به نه ږدي چې د سولې په معامله کې د افغانستان ملي ګټې او ستر ارزښتونه قرباني شي.
