ولسمشر غني وايي چې د موقت حکومت طرحه له هېواده د باندې جوړه شوې او په افغانستان کې د پلې کېدو وړ نه ده. نوموړي ویلي، هغه کسان چې د موقت حکومت طرحې وړاندې کوي، له خلکو ډارېږي. غني زیاته کړې چې د افغانستان ولسمشر افغانانو ټاکلی دی او د هغه لرې کول د پاکستان، ایران او مسکو کار نه دی، هغه خلک چې د موقت حکومت خبره کوي، طرحه یې بېروني او ناکامه ده. نوموړي دا څرګندونې د ځوانانو یوې غونډې ته کړې دي.
پوښتنه دا ده چې رښتیا هم د موقت حکومت طرحه د پاکستان، روسیې او ایران ده، که بل څوک هم د دې طرحې تر شا دي او ولسمشر ولې د اصلي طراحانو نوم نه اخلي؟
د افغانستان د سیاسي جوړجاړي لپاره د موقت، انتقالي او سرپرست حکومت خبره کېږي. دا خبرې د سیاسي کړیو ګرم بحث دی. ویل کېږي چې امریکا او طالبانو هم په دې اړه خبرې کړې دي، خو هوکړه یې کړې چې دا چاره به پټه ساتي، نو ځکه بیا بیا دواړه لوري موقت حکومت ردوي. هغوی چې د موقت یا انتقالي حکومت خبره کوي، دا چاره له سولې سره تړلې ګڼي او وايي چې دا چاره به سولې او د سولې د شوي توافق عملي کولو ته لاره پرانیزي. ولسمشر د دې لپاره د موقت حکومت مخالفت کوي، چې په دغه حکومت کې د ده ځای نشته او پر ټاکنو ځکه ټینګار کوي چې فکر کوي ټاکنې ګټي او د همدې لپاره یې سر له اوسه د پراخو دولتي امکاناتو کارول پیل کړي دي.
ولسمشر د موقت حکومت مخالفت بیا بیا کوي، خو دا ځل یې دا چاره له مسکو، تهران او اسلام اباد سره تړلې ده. ټول پوهېږي چې د موقت حکومت بحث د سولې له خبرو سره را پیل شوی دی. دا هم روښانه ده چې د سولې خبرې او روانه پروسه امریکا پیل کړې، نو له شک پرته د موقت حکومت د بحث او غوښتنې سرچینه هم امریکايي لوری دی. د امریکا د مشهور بنسټ (رنډ) په طرحه کې په واضحو ټکو د اتلس میاشتني انتقالي حکومت خبره شوې او ټوله طرحه پر همدې چاره را څرخي. مشهور امریکايي افغانستان پېژندونکې ( بارنېټ روبین) چې ډېری وخت یې د نظریاتو پر اساس د افغانستان لپاره د امریکا پالیسي جوړېږي، هم د موقت حکومت خبره کوي. دا او دې ته ورته نور داسې شواهد شته چې د موقت، انتقالي او یا سرپرست حکومت طرحه د امریکا ده او د سولې په چاره کې ترې کار اخلي. له شک پرته د افغانستان شریر دښمن پاکستان، ایران او روسیه به هم دا ډول کومه طرحه لري، خو اصلي طرحه د امریکا ده.
ولسمشر د دې پر ځای چې د اصلي طراح نوم واخلي او مخالفت یې وکړي، هڅه کوي چې عامه افکار بل لور ته بوځي. که موقت، انتقالي او یا سرپرست حکومت رښتیا د افغانستان پر زیان وي، نو ولسمشر باید خلکو ته دا زیانونه بیان کړي او بیا په واضحو ټکو د امریکا نوم واخلي او مخالفت یې وکړي. که ولسمشر یوازې د سولې په چاره کې د خنډ پیدا کولو، د خلکو په سترګو کې د خاورو شیندلو، د عامه ذهنیت د خرابولو او د خپل واک د دوام په هڅه کوي، نو خلک پوهېږي او دا هڅه یې ناکامه ده.
