ټاکل شوې چې نن په قطر کې د طالبانو او امریکايي استازو ترمنځ خبرې بیا پیل شي. په دغو خبرو کې به امریکايي پلاوی د زلمي خلیلزاد او طالب پلاوی به د عباس ستانکزي په مشرۍ برخه اخلي. له دې وړاندې د امریکا او طالبانو دوو تخنیکي کمېټو کار پیل کړی و. د دغو کمېټو دنده دا وه چې یوه یې د بهرنیو ځواکونو د وتلو د څرنګوالي او مهالوېش یوه طرحه جوړه کړه او دویمې یې پر دې کار کاوه چې څنګه د افغانستان خاوره بیا د بهرنیو هېوادونو پر ضد ونه کارول شي. دواړې کمېټې به خپلې طرحې نننۍ غونډې ته وړاندې کوي او دواړه لوري به پرې بحث کوي.
دا ځل خبرې تر پخوانیو خبرو لا زیاتې مهمې دي، ځکه چې پر مهو او بنسټیزو مسایلو پکې بحث کېږي، چې ښايي پر ځینو مسایلو توافق هم وشي. له افغانستان څخه د بهرنیو ځواکونو وتل د وسله والو طالبانو اصلي غوښتنه ده، چې تخنیکي کمېټو پرې کار کړی او ډېر احتمال شته چې په دې اړه طالبان او امریکا یوې وروستۍ هوکړې ته ورسېږي. دغه راز امریکا هم له دې وېره لري چې افغانستان یې یو ځل بیا پر ضد ونه کارول شي، نو په دغو خبرو کې به هغه طرحه هم وړاندې شي چې د افغانستان خاوره به د امریکا او د امریکا د ملګرو پر ضد نه کارول کېږي. په دې چاره کې هم د هوکړې احتمال زیات دی او هم دا هغه څه دي چې ښايي په رسمي ډول اعلان شي.
اوس چې ښکاري د دواړو لوري اساسي غوښتنې منل کېږي او د اختلاف اساسي ټکې له منځه ځي، نو وروسته داسې لوی مسایل نه پاتې کېږي چې په خبرو کې د خنډ په توګه پاتې شي. که څه هم هیله زیاته ده او باور دی چې دا ځل به د بهرنیو ځواکونو د وتلو پر څرنګوالي هوکړه کېږي، خو لا هم د امریکا پر اراده او نیت شکونه شته. که امریکا رښتیا غواړي چې افغانستان ته سوله او ثبات را وګرځي، نو دا چاره به مخکې ولاړه شي، خو که امریکا کوم بل پلان لري، نو بیا وېره ده چې دا ځل خبرې به هم هغسې پایله ونه لري چې تمه یې کېږي. اوس د امریکا پر نیت او اراده شکونه شته، ځکه چې له امریکايي لوري تل هڅه شوې چې اساسي موضوعات څنګ ته پرېښودل شي او پر فرعي مسایلو بحث وشي. دوی ډېر نه حاضرېږي چې د ځواکونو پر وتلو بحث وکړي، بلکې بیا بیا پر ځینو نورو مسایلو ټینګار کوي. امریکا وايي چې طالبان دې اوربند اعلان کړي، له حکومت سره دې خبرې وکړي او ځینې نور کارونه دي وکړي. طالبان باید دا کار وکړي، خو امریکا تر هغه وړاندې باید په روښانه ټکو ووايي چې له افغانستان څخه وځي او په دې اړه باید یوه رسمي هوکړه هم لاسلیک کړي.
د افغانستان خلک د قطر دغو خبرو ته په تمه ده. دا خبرې به له یوه اړخه د امریکا او طالبانو ترمنځ اساسي مسایل حل کړي او له بله اړخه به د دې زمینه برابره کړي چې افغانان هم خپلمنځي تفاهم ته ورسېږي او پر هغو مسایلو خبرې او موافقه وکړي چې د افغانستان کورنی او بهرنی راتلونکی دی.
