پرون بیا په قطر کې د طالب او امریکايي استازو ترمنځ خبرې وشوې. دواړه لوري پر مهمو او لانجمنو مسئلو له اختلاف وروسته خبرو ته را ګرځېدلي دي. په دغو خبرو کې یو ځل بیا د بهرنیو ځواکونو پر وتلو او د امریکا او ملګرو پر ضد یې د افغان خاورې پر نه استعمال خبرې شوې دي. طالبان او امریکايي لوري دواړه له دې خبرو خوښ ښکاري او د پرمختګونو خبره کوي، خو په رسمي ډول نه وايي چې کوم پرمختګونه شوي دي.
امریکا منلې چې ځواکونه به یې د یو مهالوېش له مخې له افغانستان څخه وځي. ټاکل شوې په دې اړه توافق هم وشي، خو امریکا وايي چې طالبان دې اوربند وکړي او له افغان حکومت سره دې خبرو ته حاضر شي. طالبانو هم په دغو خبرو کې منلې، چې د امریکايي ځواکونو د وتلو په تړاو له توافق او رسمي اعلان وروسته به مشروط اوربند کوي، خو له افغان حکومت سره په خبرو کې لا هم طالبان ستونزه لري او دواړه اړخونه کار کوي چې دې ربړې ته هم کومه حللاره پیدا کړي.
د خبرو دویمه موضوع دا ده چې افغان خاوره به د امریکا او د امریکا د ملګرو پر ضد نه کارول کېږي. طالب استازي وايي چې دوی به چاته اجازه ور نه کړي چې افغان خاوره د چا پر ضد وکاروي او په دې اړه تضمین هم ورکوي. امریکا بیا وايي چې که افغان خاوره د امریکا پر ضد وکارول شي، نو څه به کېږي؟ امریکا د دې لپاره هڅه کوي چې د ځینو ځواکونو پر پاتې کېدو ټینګار وکړي. که ځواکونه نه پاتې کېږي، نو امریکا به بیا د ځمکنیو او هوایي عملیاتو حق ولري. طالبان بیا په دې اړه بېل نظر لري او وايي چې لومړی به افغان خاوره د امریکا پر ضد نه کارول کېږي، خو که چا دا کار وکړ، طالبان به یې پر ضد ګام اخلي او خپله به جزا ورکوي. په دې اړه پرون هم د دواړو لورو ترمنځ جدي او مهم بحثونه شوي دي چې پکې د پرمختګونو خبره هم شوې ده.
داسې ښکاري چې امریکايي لوری او طالبان سره له دې چې هڅه کوي خپلې ګټې خوندي کړي او پر مقابل اړخ خپل شرایط ومني، خو هڅه کوي چې په دغو خبرو کې حتمي یو جوړجاړي ته ورسېږي. له شوو خبرو داسې ښکارېږي چې د جوړجاړي شونتیا زیاته شوې ده او ښايي په همدې غونډه کې کومه هوکړه هم لاسلیک شي. ان ځینو سرچینو او رسنیو ادعا کړې چې هوکړه لیک تیار شوی دی او ښايي په رسمي ډول لاسلیک شي او بیا له خلکو سره هم شریک شي.
په روانو خبرو کې دغو پوښتنو ته هم ځواب ویل کېږي چې د امریکا او طالبانو له توافق وروسته به څه کېږي. امریکا هڅه کوي چې طالبان له افغان حکومت سره خبرو ته قانع کړي او یا هم بله داسې لاره پیدا کړي، چې دا خلا ډکه شي. د امریکا او طالبانو توافق مهم او بنسټیز پرمختګ دی، خو په دې چاره کې وړاندې تګ او افغاني اړخ یې هم مهم دی چې پکار ده سر له اوسه ورته پام وشي او داسې ښکاري چې په قطر کې به دا چاره هم واضح کېږي.
