له اوږدو لانجو وروسته پرون د ټاکنیزو کمېسیونو غړو لوړه وکړه. د ټاکنو د نوي قانون پر اساس د دواړو کمېسیونو غړي او د دارالانشاء رییسان وټاکل شول. نوي کمېشنران به له یوه اړخه د تېرو ټاکنو برخلیک روښانولو، په کمېسیونو کې د اصلاحاتو راوستلو او له بله اړخه به د راتلونکو ولسمشریزو، ولایتي او ولسوالیو شوراګانو او د غزني د پارلماني ټاکنو لپاره تیاری نیسي.
د کمېسیون پر نوو غړو سر له اوسه باور نشته. که څه هم دا کسان نوي دي او لا یې کار نه دی پیل کړی، خو د ډېری کمېشنرانو زده کړو، کاري تجربې، پخوانیو کړنو او تړاوونو ته په کتو سره داسې ښکاري، چې موږ له یوه غمه خلاص شوو او پر بل غم واوښتو. ډېری کمېشنران په اړونده برخه کې هېڅ زده کړې نه لري، ځینې یې ان په ټاکنو کې یوه ورځ کاري تجربه نه لري او ځينې یې د ټاکنو پر الف او با هم نه دي خبر. د ځینو یې د اسنادو د جعل خبرونه خپاره شول او پر ځینو په پخوانیو دندو کې د فساد او تعصب تورونه دي، نو له همدې امله خلک ناهیلي دي او فکر کوي چې موږ له باران څخه ناوې ته راغلو.
د ټاکنیزو شکایتونو کمېسیون پخواني غړي د یوې کړنلارې له مخې ټاکل شوي وو، چې ولسمشر پکې ځانګړی رول درلود. له اوږدو لانجو وروسته ولسمشر او اجرایه رییس له کاندیدانو سره مرکې وکړې او په پایله کې یې تېر کمېشنران وټاکل شول. تېرو کمېشنرانو ټاکنې بندنامې کړې، کمزوری مدیریت او فساد بیخي زیات و او دوی زموږ یوه بله ملي پروسه بدنامه، مسخره او خرابه کړه. د تېرو کمېشنرانو د ټاکلو له امله ولسمشر او اجرایه رییس له شرم او فشار سره مخ وو، ځکه دا کمېشنران دوی ټاکلي وو او دې چارې ته یې د اصلاحاتو نوم ورکړی و. د همدې شرم او فشار په سیوري کې دوی یوې داسې طرحې ته تسلیم شول چې پکې ډېرې ستونزې وې او همدغه طرحه یې په نوي قانون واړوله. اوس د دغه قانون پر اساس کمېشنران وټاکل شول چې سره له اوسه یې ناکاره توب ښکاره دی.
کیسه هغه وخت لا خرابه ښکاري چې کله موږ د دغه نوو کمېسیونو دندو ته وګورو. دوی به تېرې ټاکنې پاکوي، ټول کارکوونکي به له دندو ګوښه کوي او نوي کسان به ګوماري. د راتلونکو ټاکنو لپاره به تیاری نیسي او هغه به د تېرو ټاکنو په پرتله ښې کوي. دا دروند بار دی او دغه کمېشنران یې د وړلو توان نه لري.
که راتلونکې ټاکنې نه کېږي، نو بیا سمه ده او همدا کمېشنران دې معاشونه واخلي او په کمېسیونو کې دې وي. داسې ښکاري چې د همدې چارې احتمال هم دی، ځکه چې د سولې خبرې به ټاکنې څنګ ته کړي، موږ به تر ډېره ټاکنې ونه لرو او پر نورو لارو چارو به کار کېږي. خو که موږ رښتیا ټاکنو ته ځو او یا اړ کېږو چې ټاکنو ته ولاړ شو، نو کیسه سره له اوسه روښانه ده. موږ له باران څخه ناوې ته را تښتېدلي یو. د دغو کمېشنرانو او کمېسیونو په وجود کې به موږ د ټاکنو په نامه یوه بله فاسده، مسخره او بدرنګه لوبه ووینو.
