په قطر کې د طالبانو او امریکايي استازو ترمنځ له شپږ ورځو خبرو وروسته هم د دغو خبرو د پرمختګونو او ستونزو په اړه رسمي معلومات نشته. دواړو لورو په تېرو ورځو کې یوازې دومره ویلي چې خبرې ښې روانې دي او دوی ورته هیله من دي. طالبانو او امریکا بیا بیا ویلي چې له افغانستانه د بهرنیو ځواکونو پر وتلو او د چا پر ضد د افغان خاورې پر نه استعمال خبرې روانې دي، خو دا چې په دې برخه کې پرمختګونه او خنډونه څه دي، یو لوری هم معلومات نه ورکوي.
داسې ښکاري چې دا خبرې له پرمختګونو سره سره له لویو خنډونو سره هم مخ دي او له همدې امله خبرې اوږدې شوې دي او تر اوسه یې هم پایله نه ښکاري. د امریکا د بهرنیو چارو وزیر مایک پمپیو هم ویلي چې په راتلونکو دوو اونیو کې قطر ته ورځي او هلته له خپلو استازو سره د سولې د خبرو په پرمختګ کې مرسته کوي. تر دې وړاندې د روسیې او ازبکستان د بهرنیو چارو وزیران هم قطر ته ورغلي وو. مایک پمپیو ویلي، امریکا په افغانستان کې داسې جوړجاړي ته د رسېدو هڅه کوي چې د ټولو افغانانو حقونه پکې خوندي شي. نوموړي ویلي، د افغانستان لانجه پېچلې ده او که سیمه ییز لوبغاړي، پاکستان، هند، چین او روسیه هم چې هر یو یې ځانته ګټې لري، پکې ورګډ شي، هغه لا پېچلې کېږي او د هواري لپاره یې خبرې اترې هم ستونزمنې کېږي.
څه چې په دغو خبرو کې روښانه دي او د مایک پمپیو په خبرو کې یې هم څرک لیدل کېږي، هغه دا دي چې طالبان له امریکا سره په خبرو کې یوازې نه دي. څه چې طالبان یې وايي، سیمه ییز ملاتړ هم لري او هغه څه دي چې د طالبانو د غوښتنې تر څنګ د سیمې غوښتنې هم پکې ځایېږي. که څه هم ویل شوي چې د ځواکونو پر وتلو توافق شوی او په دې برخه کې ستونزه نشته، خو لا هم امریکا غواړي چې په افغانستان کې د پاتې کېدو لپاره لارې چارې ولټوي. دا هغه څه دي چې طالبان یې نه مني او له همدې امله خبرې اوږدې شوې دي. د سیمې د هېوادونو دریځ له طالبانو سره مرسته کوي چې پر خپله خبره ودرېږي او دې چارې بیا امریکا ته ستونزې پیدا کړې چې پر طالبانو خپلې خبرې ومني.
امریکا له طالبانو سره د خبرو له پیل وړاندې فکر کاوه چې خپلې اساسي غوښتنې پر طالبانو منلی شي، خو اوس داسې ښکاري چې دوی په دې چاره کې له خنډ سره مخ دي. د امریکا لپاره په افغانستاني د نظامي ځواک ساتل اساسي خبره ده، خو طالبان بیا دا د ځان لپاره سره کرښه ګڼي او دا هغه څه ده چې سیمه ییز هېوادونه هم پرې له طالبانو سره یوه خوله دي. امریکا که د مخامخ نظامي ځواک غوښتنه نه کوي، خو د امریکا پر ضد د افغان خاورې د نه استعمال په بحث کې دا غوښتنه کوي. اوس داسې ښکاري چې همدې چارې خبرې له خنډ سره مخ کړې دي او په راتلونکو څو ورځو کې به معلومه شي چې امریکا کومه بله لاره مني او که د خپلو غوښتنو پر منلو ټینګار کوي.
