دا کتاب په اوسنۍ پېړۍ کې د ښه ژوند د پېژندنې په اړه د رالف دوبلي د څېړنو او تجربو ټولګه ده چې په ۵۲ برخو کې یې تنظیم کړې ده.
لیکوال د ښه ژوند په اړه لنډې او منطقي لارې بیانوي چې له لوستونکو سره مرسته کولای شي چې ډېری د ژوند مسایل عادي وګڼي او حقیقي او د کنټرول وړ هغه بیا جدي ونیسي.
لیکوال په سریزه کې وایي چې دا اثر د ۲۱مې پېړۍ لپاره د کلاسیک ژوند فلسفه بللای شو. نوموړی د بریا، خوښۍ او شتمنۍ په اړه نوي او منل شوي تعاریف او تګلارې وړاندې کوي.
د کتاب پښتو ژباړه نوید عمر کړې، ۲۲۴ مخونه لري، یوه سریزه، ۵۲ بابه او یوه وروستۍ برخه لري. کتاب تازه اکسوس کتابپلورنځي خپور کړی او د کابل سربېره د هېواد په نورو مشهورو کتابپلورځیو کې هم د لاسرسي وړ دی.
