د منځنۍ آسیا د تماس ډلې جوړېدل؛ د سیمې د همکارۍ نوې دروازه

د منځنۍ آسیا هېوادونو له‌خوا د ځانګړو استازو په کچه د تماس ډلې جوړېدل، د سیمې د هېوادونو لپاره د یو بل سره د نږدې کېدو او ګډو همکاریو د لا پیاوړتیا لپاره یو مهم ګام دی. افغانستان د دې اقدام هرکلی کړی او دا یې د سیمه‌ییز اتصال او همغږۍ لپاره اغېزناک بللی دی. دا دریځ یوازې یو سیاسي اعلان نه دی، بلکې د یوې داسې اړتیا څرګندونه ده چې د افغانستان راتلونکی ورسره تړلی دی.
افغانستان د جغرافیایي موقعیت له پلوه د منځنۍ آسیا او جنوبي آسیا ترمنځ د یو طبیعي دهلېز په توګه مطرح دی. د دې هېواد له لارې کولای شي د منځنۍ آسیا انرژي او سوداګري د نړۍ مهمو بازارونو ته ورسېږي. همدارنګه، افغانستان د سیمې له هېوادونو سره د ګډو اقتصادي او ټولنیزو پروژو د تطبیق لپاره ستر امکانات لري، چې د افغانستان د ثبات او پرمختګ ترڅنګ د ګاونډیو هېوادونو لپاره هم د پام وړ ګټې زېږوي.
د منځنۍ آسیا د تماس ډلې لومړۍ غونډه، چې په تاشکند کې د قزاقستان، قرغیزستان، تاجیکستان او اوزبیکستان د استازو په ګډون جوړه شوه، ښيي چې دغه هېوادونه د سیمه‌ییزو ننګونو او فرصتونو د ګډ مدیریت لپاره نوي لارې لټوي. افغانستان، سره له دې چې له ګڼو ستونزو سره مخامخ دی، خو لا هم د یو مهم شریک په توګه د سیمې په معادلاتو کې ځای لري. د افغان حکومت د مرکزي ویاند مرستیال په څرګندونو کې دا ټکي واضح شوی چې افغانستان غواړي نه یوازې د اقتصادي اړیکو پراختیا وکړي، بلکې په کلتوري او ټولنیزو برخو کې هم د همکارۍ زمینه برابره کړي.
په اوسنیو شرایطو کې چې نړۍ د اقتصادي ګډوډیو، امنیتي ننګونو او سیمه‌ییزو کړکېچونو شاهد ده، د افغانستان لپاره یوازینۍ اغېزمنه لاره دا ده چې له سیمه‌ییزو همکاریو سره یوځای شي او خپله جغرافیایي برتري د ګډو ګټو لپاره وکاروي. د سیمې هېوادونه هم په دې پوهېږي چې د افغانستان له بې‌ثباتۍ پرته د سیمې پر مخ د پراختیا دروازې نه شي پرانیستل کېدای. له همدې امله، د منځنۍ آسیا د تماس ډلې په څېر جوړښتونه کولای شي د ګډو هڅو لپاره یو اغېزناک چوکاټ برابر کړي.
د افغانستان راتلونکی له سیمې سره د تړاو او همکارۍ په تګلاره کې نغښتی دی. که د منځنۍ آسیا هېوادونه د ګډو پروژو لکه د ټاپي پایپ لاین، کاسا-۱۰۰۰ برښنا پروژه، د رېل پټلۍ جوړول او د سوداګرۍ د لارو پرانیستل جدي تعقیب کړي، نو دا به نه یوازې د افغانستان اقتصادي راتلونکی روښانه کړي، بلکې د ټولې سیمې د سوکالۍ بنسټ به هم کېږدي.
اوس د افغان حکومت لپاره وخت دی چې د سیمه‌ییزو ابتکاراتو هرکلی یوازې په اعلامیو کې محدود نه کړي، بلکې عملي اقدامات وکړي. د اقتصادي، ټولنیزو او فرهنګي همکاریو د پراخېدو لپاره باید اسانتیاوې برابرې شي، د سوداګرۍ خنډونه له منځه ولاړ شي او د سیمې هېوادونو پر وړاندې د باور وړ شراکت وړاندې شي.
د منځنۍ آسیا د تماس ډلې جوړېدل د سیمې د هېوادونو لپاره یوه نوې دروازه پرانیزي، چې د سولې، ثبات او اقتصادي پراختیا لپاره په ګډه ګامونه پورته کړي. افغانستان کولای شي د دې دروازې له پرانیستو څخه د یوې تاریخي موقع په توګه ګټه واخلي او خپلې ملي ګټې له سیمه‌ییزو ګټو سره وتړي.