د چين سوداګرۍ وزارت وياند د سپتمبر په ۲۰مه نېټه خبر ورکړ، چين او امريکا د سپتمبر په ۱۴مه او ۱۵مه نېټې د هسپانيا په مادريد کې خبرې اترې وکړې او په همکارۍ سره د ټيکټاک مسئلې د حل، په يو بل کې د پانګونې د هڅونې او د اقتصادي او سوداګريزې همکارۍ د پرمخبيولو په باره کې بنسټيزې او چوکاټي موافقې ته رسېدلي دي. د دواړو هېوادونو مشرانو د سپتمبر د ۱۹مې نېټې په شپه په تیليفون باندې خبرې وکړې، د دوه اړخيزو اړيکو او د ګډې علاقې وړ مسئلو په اړه يې يو بل ته خپلې نظريې په ډاګه کړې او په راتلونکې مرحلې کې يې د دواړو هېوادونو د ثابت پرمختګ ستراتيژيکه لارښوونه کړې ده.
د چين د سوداګرۍ وزارت وياند هيله وښوده چې امريکايي لوری له چين سره پر يو لوري ګامونه پورته کړي، په امريکا کې د ټيکټاک په شمول د چيني تصديو دوامدار چلېدو ته ورخلاص، مساوي، عادلانه او پرته له سپکاوي سوداګريز چاپېريال برابر کړي او د چين او امريکا د اقتصادي او سوداګريزو اړيکو ثابت، سالم او دوام لرونکی پرمختګ پرمخ بوزي.
نوموړي دا هم ويلي، چيني لوری په ټيکټاک مسئله کې دايمي او روښانه دريځ ساتي. د چين حکومت د تصديو ارادې ته درناوی لري او په دې خوښ دی چې اړوندې تصدۍ د بازاري قواعدو پر بنسټ سوداګريز مذاکرات تر سره کړي او د چيني قوانينو، قواعدو او ګټو سره سمون لرونکې لايحه رامنځته کړي.
