د علم د مشعل ساتونکي؛ د معلم د ورځې د قدردانۍ او درناوي ورځ

پرون ورځ د هغو زړورو او مخلصو ښوونکو د درناوي ورځ وه، چې د ټولنې د فکري رغونې بنسټ یې ایښی افغان معلمان چې د ستونزو، اقتصادي فشارونو، او د امکاناتو د کمښت سره سره د وطن د بچیانو د ښوونې او روزنې لپاره له مینې، صداقت او ژمنتیا سره هڅې کوي.
په افغانستان کې معلم نه یوازې د علم ورکوونکی دی، بلکې د انسان جوړونې، د افکارو د رڼا خپروونکی، او د راتلونکي نسل لارښود هم دی. هغه له داسې ستونزو سره مخ دی، چې شاید تصور یې هم ګران وي، خو بیا هم د خپل مسلک سپېڅلتیا یې نه ده پرې ایښې. دا معلم دی، چې د هر موسم په سهار کې له خپل کور څخه راځي، د ماشومانو ذهنونه روښانوي، او د دې خاورې راتلونکې ته رڼا ورکوي.
په ځانګړي ډول باید افغانستان کې د ښځینه ښوونکو زحمتونه او همت لا ډیر وستایل شي، کومې چې د ګڼو ټولنیزو او اقتصادي خنډونو سره سره د افغانو نجونو د زده‌کړې لپاره قربانۍ ورکوي. د دوی دا زړورتیا او ژمنتیا د یو رڼا‌من افغانستان بنسټ جوړوي. هره نجلۍ چې لوړې او منځنۍ زده‌کړې کوي، د یوې ښځینه ښوونکې د هڅو، زړورتیا او مهربانۍ نتیجه ده. دا ښځینه ښوونکې دي، چې د نسلونو برخلیک بدلوي.
د معلم خدمت یوازې د ښوونځي تر خونو محدود نه دی، بلکې د ټولنې د شعور د ودې او د فکر د بدلولو تر ټولو مهم ځواک هم دی. هر هېواد هغه وخت پرمختګ کولی شي، چې د خپلو ښوونکو او تعلیمي بنسټونو درناوی وکړي، هغوی ته لازم امتیازات، مناسب معاش، او د کار لپاره غوره چاپېریال برابر کړي. له بده مرغه، زموږ په هېواد کې لا هم ډېری ښوونکي له اقتصادي فشارونو سره ژوند کوي، خو د دوی همت د ستاینې وړ دی، ځکه دوی د وطن د بچیانو د رڼا لپاره د تیارو زغملو ته تیار دي.
هېره نه کړو چې علم د پرمختګ کلي ده، او دا کلي یوازې معلم پرانستلی شي. له همدې امله، د معلم د مقام لوړوالی د ټول ملت مسؤلیت دی. که موږ د معلم د لاس‌نیوۍ او ملاتړ پالیسي ونه لرو، د علم مشعل به ورو ورو کمزوری شي.
موږ هیله لرو چې په نږدې راتلونکي کې د افغانستان د هرې سیمې، کلي، او ښار هر ماشوم ته د زده‌کړې مساوي زمینه برابره شي. دا د دولت، خلکو، او نړیوالو همکارانو ګډ مسؤلیت دی، چې هلکانو او نجونو ته د زده‌کړې فرصتونه رامنځته کړي. یو ملت هغه وخت ریښتینی آزاد او باعزته کېږي، کله چې د علم پر بنسټ ودریږي.
د معلم ورځ یوازې د مبارکۍ ورځ نه ده، بلکې د ژمنې ورځ هم ده — دا ژمنه چې موږ به د خپلو ښوونکو درناوی کوو، د دوی ملاتړ به کوو، او د دوی هڅو ته به عملي بڼه ورکوو. هر زده‌کوونکی چې د خپل استاد درناوی کوي، د یو رڼا‌من راتلونکي د جوړېدو برخه ګرځي.