ولسمشر غني وايي، افغانان ځکه د سولې لپاره ضمانت غواړي چې د سراسري امنیت سبب شي. نوموړی وايي، د سولې نړیوالې تجربې ښودلې چې که دغه بهیر په دقت ونه سنجول شي، د امنیت پر ځای د لا ناامنۍ سبب کېږي. ولسمشر غني دغه راز وايي چې د سولې روان بهیر تر دې دمه په دقت او تدبیر سره پر مخ تللی دی او افغانان ځکه د سولې لپاره ضمانت غواړي، چې د سراسري امنیت سبب شي.
د سولې په تړاو د ولسمشر غني خبرې متضادې، د سولې ضد او له ابهاماتو ډکې دي. ولسمشر غني له یوه اړخه وايي، چې د سولې پروسه ښه روانه ده او په دقت او تدبیر سره پر مختللې ده، خو له بله اړخه کله وايي چې څوک دې را باندې ګندمک تړون نه لاسلیک کوي، کله وايي چې یو کوچنی اقلیت د بندو دروازو تر شا تصمیم نه شي نیولی او کله هم په واضح ډول له روانو خبرو ناراضیتوب څرګندوي. له همدې امله د سولې په اړه د هغه خبرې او دریځ ثابت نه، بلکې متضاد دی. اوس یې تازه ویلي چې خبرې ښې روانې دي، خو وايي ضمانت غواړي. اوس پوښتنه دا ده چې که ښې روانې وي، ضمانت ته څه اړتیا ده او که ناسمې روانې وي او د ضمانت اړتیا وي، نو بیا ولې وايي چې خبرې ښې روانې دي؟ دا یو ښکاره تضاد دی. ولسمشر د ضمانت خبرې کوي، خو دومره جرئت نه لري چې ووايي، له چا ضمانت غواړي. خبره روښانه ده چې د سولې روانه پروسه امریکا پر مخ بیايي، نو ولسمشر بیا ولې په واضحو ټکو نه وايي چې له امریکا ضمانت غواړو؟ دغه راز که له امریکا ضمانت غواړو، نو بیا ولسمشر ولې وايي، چې د امریکا پر اراده باید شک ونه کړو!؟
د ولسمشر ځینې خبرې ګونګې هم دي، مخاطب یې معلوم نه دی او یوازې غواړي چې د سولې په اړه عامه ذهنیت خراب کړي. د هغه وروستۍ خبرې او دریځونه د سولې ضد دریځونه دي او په ټول توان هڅه کوي چې د سولې روانې خبرې له خنډ او ځنډ سره مخ کړي. ولسمشر غني فکر کوي چې د سولې په راتګ سره به یې واک ختم شي او که سوله ونه شي، نو له حکومتي امکاناتو په استفادې سره یو ځل بیا ټاکنې ګټلی شي او د پنځو کلونو لپاره به ولسمشر وي. له همدې امله د سولې د خبرو مخالفت کوي او غواړي چې دا هڅې ناکامې شي. البته یوه خبره واضح ده او هغه دا چې ولسمشر له یوه اړخه له عامه ذهنیت څخه وېره لري او له بله اړخه له امریکا وېرېږي، نو ځکه دا مخالفت یې په داسې ټکو دی چې ځان ته پکې د تېښتې لاره پرېږدي. له همدې امله له یوه اړخه د سولې خبرې کوي او له بله اړخه یې خبرې، دریځونه او کارونه د سولې مخالف دي. که د ولسمشر وروستۍ خبرې او دریځونه وکتل شي، له یوه اړخه مبهم دي، له بله اړخه د سولې په اړه متضادې خبرې کوي او له بله اړخه داسې خبرې کوي، چې د سولې په اړه ذهنیت خراب شي او په دې ډول د سولې هڅې شنډې شي. سوله د افغان ولس غوښتنه او اړتیا ده، سوله د دغه هېواد د هر بچي اړتیا ده، د ولسمشر او ملګرو بچیان او کورنۍ به یې سولې ته اړتیا ونه لري، ځکه هغوی په نورو هېوادونو کې امن او خوشاله ژوند لري. ولس دا هر څه درک کوي او چاته به اجازه ورنه کړي چې د سولې پر وړاندې خنډونه جوړ کړي.
