د مېروېس نیکه درې ورځنۍ ټېسټ یا فرسټ کلاس سیالۍ چې یوه میاشت وړاندې په ننګرهار او کونړ ولایتونو کې پیل شوې وې پرون د مارچ په ۱۵ مه نېټه پای ته ورسېدې.
له دې سیالیو وړاندې په ننګرهار او کونړ کې د ټولو زونونو ترمنځ دوه ورځنۍ سیالۍ هم وشوې، چې له هغو څخه یواځې د پنځو ولایتونو لوبډلې درې ورځنیو سیالیو ته لار پېدا کړه.
د مېروېس نیکه درې ورځنیو سیالیو ته کونړ، کابل، خوست، کندهار او کندوز لوبډلې غوره شوې وې.
دا سیالۍ د فبروري په ۱۵ مه نېټه پیل شوې او کابو یوه میاشت وروسته د مارچ په ۱۵ مه نېټه د جمعې په ورځ پای ته ورسېدې.
په افغانستان کې د لومړي ځل لپاره د دې سیالیو تاسیس سږ کال وشو، د دې سیالیو لومړۍ لوبه کې کابل لوبډله د خوست لوبډلې پر وړاندې د فبروري په ۱۵ مه نېټه په غازي امان الله خان لوبغالي کې مخ شوه، کابل په یوه پاڼۍ توپ وهنه کې د اته لوبغاړو په سوځېدو سره د نثار وحدت د ۲۶۲ منډو په مرسته ۴۹۸ منډې وکړې.
نعمت الله د خوست لوبډلې لپاره درې وېکټې واخېستې.
خوست لوبډلې یو ځل د ټولو لوبغاړو په سوځېدو سره د یوسف شاه د ۵۷ منډو پرمټ ۲۶۸ منډې جوړې کړې.
خوست بیا هم توپ وهنه وکړه، دې لوبډلې دا ځل د ۶ وېکټو په نقصان سره ۲۸۰ منډې وکړې او د لوبې ورځې تمامې شوې، لومړۍ لوبه د خوست او کابل ترمنځ مساوي شوه او د لوبې غوره لوبغاړی نثار وحدت اعلان شو، هغه په لومړۍ پاڼۍ توپ وهنه کې د خوست درې وېکټې وغورځولې.
دوهمه لوبه
دوهمه لوبه د کونړ او کندهار ترمنځ په کونړ ولایت کې ترسره شوه، کونړ یو ځل توپ وهنه وکړه، دې لوبډلې د شپږ لوبغاړو په سوځېدو سره د حنیف کونړي د ۲۰۰ ناسوځېدلو منډو او د اعجاز الحق د ۱۵۳ ناسوځېدلو منډو پرمټ ۴۴۳ منډې وکړې.
رحیم الله سهاک درې وېکټې واخېستې.
لومړی ځل د کندهار ټولې وېکټې په ۱۲۰ منډو ولوېدې، محبت مومند د کندهار پنځه لوبغاړي وسوځول.
کندهار دوهم ځل لپاره د یوې وېکټې په لوېدو سره سل منډې وکړې او د وخت په پوره کېدو سره لوبه مساوي شوه.
د لوبې غوره لوبغاړی حنیف کونړی ونومول شو.
دریمه لوبه
دریمه لوبه د کابل او کندوز لوبډلو ترمنځ په غازي امان الله خان لوبغالي کې وشوه، دا لوبه هم د وخت د پای ته رسېدو له امله مساوي شوه، د کندوز لپاره حیات الله ۱۰۰ ناسوځېدلې منډې وکړې او د لوبې غوره لوبغاړی هم حیات الله اعلان شو.
دا لوبه د فبروري په ۲۰ مه نېټه پیل شوې وه او په ۲۲ مه نېټه پای ته ورسېده.
څلورمه لوبه
څلورمه لوبه د خوست او کونړ ترمنځ په کونړ ولایت کې د باران له امله لغوه شوه او هیڅ ترسره نه شوه.
پنځمه لوبه د کندوز او خوست ترمنځ مساوي شوه، شپږمه لوبه د کندهار او کابل ترمنځ مساوي شوه.
اوومه لوبه د کونړ او کابل ترمنځ مساوي شوه او اتمه لوبه بیا کندهار او کندوز ترمنځ د باران له امله هیڅ ترسره نه شوه.
وړمه پنجشنبه د مارچ په ۷ مه نېټه ۹ مه لوبه د کندهار او خوست ترمنځ په غازي امان الله خان لوبغالي کې پیل شوې وه، دا لوبه خوست لوبډلې په ۱۰۴ منډو وګټله.
او لسمه لوبه د مارچ په ۷ مه نېټه د کونړ او کندوز ترمنځ په کونړ کې ترسره شوه دا لوبه مساوي شوه، خو دا چې کندوز له پیل تر پایه ښې لوبې کړې وې، نو نومرې یې د نومرو په جدول کې لوړې وې او پایلوبې ته ورسېد.
پایلوبې ته کندوز د ۴۹ نومرو په لرلوسره ورسېده او کابل بیا ۴۶ نومرې دلودې، چې پایلوبې ته یې لار وموندله.
کونړ، خوست او کندهار لوبډلې له سیالیو بهر شوې.
د مېروېس نیکه درې ورځنیو سیالیو پایلوبه
مېروېس نیکه درې ورځنیو سیالیو پایلوبه د کرکټ بورډ د ډېری چارواکو او خبریالانو په شتون کې ترسره شوه.
کابل لوبډلې لومړی توپ وهنه وکړه، دې لوبډلې ۵۳۱ منډې وکړې او ټول لوبغاړي یې وسوځېدل.
مېروېس ځاځي ۱۵۹، محمدسردار ۸۵، امان الله رفیقي ۶۷، عُبید هوتک ۵۶ او عرفان ساپي ۵۲ منډې وکړې.
د کندوز لپاره سمیع الله څلور او او سلیم درې وېکټې واخېستې.
کندوز په لومړۍ پاڼۍ توپ وهنه کې د ټولو لوبغاړو په سوځېدو سره ۲۲۲ منډې وکړې، ذاهد ذاخېل ۷۶ او عبدالهادي ۷۳ منډې وکړې.
کابل دوهمه پاڼۍ کې د څلور وېکټو په لوېدو سره د نثار وحدت د ۱۳۷ سوځېدلو منډو او د سلېمان ساپي د ۱۰۱ ناسوځېدلو منډو په مرسته ۳۴۶ منډې وکړې او بیا یې پاڼۍ کندوز ته پرېښوده.
کندوز د دریمې ورځې تر پایه ۱۸۸ منډې وکړې او درې لوبغاړي یې وسوځېدل، دا لوبه د وخت د پای ته رسېدو له امله مساوي شوه.
د کرکټ بورډ د ویاند محمد فرید هوتک په وېنا دا چې کابل ښه لوبه کړې وه او ښه پواینټونه واخېستل نو، د لوبو لومړی جام کابل لوبډلې ته ورکړل شو.
محمد فرید هوتک یاران ته وویل، چې د دې لوبو څخه غوره لوبغاړي په نښه شول، چې راتلونکو لوبو کې به ترې ګټه واخېستل شي.
د کرکټ بورډ اجرایوي مشر اسدالله خان بیا لوبغاړي اتلان یاد کړل.
د دې لوبې غوره لوبغاړی له کابل لوبډلې څخه مېروېس ځاځي اعلان شو او ټولو لوبو غوره لوبغاړی بیا د کندوز لوبغاړی حیات الله وپېژندل شو.
محمدالله همکار په پرونۍ پایلوبه کې اته وېکټې اخېستې وې او نثار وحدت بیا ښه توپ وهنه کړې وه.
ځوانو لوبغاړو دا سیالۍ د افغانستان د کرکټ د غوړېدو لپاره خورا مهمې وبللې.
په دې سیالیوکې د پایلوبې په ګډون ټولې یوولس لوبې شاملې وې.
له دې ځایه ددې لیکنې شریکول مه هیروئ:
