لا هم هېڅوک نه پوهیږي چې د سولې د روانو خبرو په اړه د حکومت دریځ څه دی. څو ورځې وړاندې ویل کېدل چې حکومت ناراضه دی او ناراضایتي ښکارېدله هم، خو ولسمشر غني بیا بیا ویل چې هر څه سم روان دي او د امریکا له خوا پیل شوې هڅې د ده طرحه ده. خبره هغه وخت بېخي بدله شوه چې کله د ولسمشر د ملي امنیت سلاکار په واشنګټن کې پر زلمي خلیلزاد سختې نیوکې وکړې. هغه خلیلزاد د طالبانو په ملاتړ، د حکومت په منزوي کولو او واک ته د خپل ځان په رسولو تورن کړ. د حمدالله محب خبرې په کابل کې چارواکو نه په بشپړ ډول رد کړې او نه یې هم تایید کړې. لا هم پوښتنه ده چې د سولې د روانو خبرو په اړه د حکومت دریځ څه دی؟
که څه هم اجرایه رییس ویلي چې د حمدالله محب خبرې ناسمې دي او هغه یې د افغانستان پر زیان ګڼلي، خو ارګ په رسمي ډول نه د محب خبرې رد کړې او نه یې هم تایید کړې دي. یوازې د ولسمشر یوه ویاند د امریکا ستاینه کړې، خو په دې اړه څه نه وايي چې د ښاغلي محب خبرې د حکومت رسمي دریځ و، که د هغه شخصي خبرې. له همدې امله پېچلتیا لا زیاته شوې ده او خلک نه پوهیږي چې د روانو خبرو په اړه د حکومت دریځ څه دی. دا خبرې سمې روانې دي؟ که سمې روانې وي، شته اندېښنو، شکونو او پوښتنو ته ځواب څه دی؟ که دا خبرې ناسمې روانې وي، نو بیا حکومت په کومو برخو اعتراض لري، ستونزه څه ده او څنګه یې مخه نیسي؟
ښايي ځواب دا وي چې خبرې ناسمې روانې دي او حکومت ترې ناراضه دی. که د حکومت دریځ همدا وي، نو بیا پکار ده چې لږ نور وضاحت هم ورکړي او په دې اړه ولس ته هر څه رښتیا ووايي. حمدالله محب خلیلزاد تورن کړی چې ګواکې غواړي د افغانستان وایسرای شي. دا د خندا وړ ادعا ده او په دې ټول پوهېږي چې په افغانستان کې د خلیلزاد د واکمنۍ شونتیا نشته. که خلیلزاد غواړي چې بل څوک واک ته ورسوي او یا کوم بل هدف لري، پکار ده چې حکومت په دې اړه واضح دریځ خپل کړي. یو بل ټکی چې محب ورته اشاره کړې، هغه دا دی چې د خلیلزاد لاره یې د امریکا لاره نه ده ګڼلې، بلکې هغه یې په شخصي اجنډا تورن کړی دی. دا هم خندوونکې ادعا ده. د امریکا حکومت د ملي یووالي حکومت نه دی چې ولسمشر یې خپله اجنډا لري، معاون یې بله، اجرایه رییس یې بله او وزیر یې بله. هلته سیسټم دی او شخص نه شي کولی چې دومره ستره لوبه د خپلو شخصي موخو لپاره وکاروي. بیا له خلیلزاد سره په خبرو کې یو امریکايي پلاوی هم دی چې پکې د بهرنیو چارو او دفاع وزارتونو استازي او د سي ای اې افراد هم دي، نو ځکه د شخصي هدف بحث څنګ ته کېږي. اوس که خبرې ناسمې روانې وي او د افغانستان پر زیان وي، دا نو بیا یوازې د خلیلزاد نه، د امریکا پلان دی او حکومت باید په دې اړه خپل ولس ته معلومات ورکړي او هر څه روښانه کړي.
حکومت دې په ماشومانه او شرموونکو خبرو او دریځونو نه ځان ته زیان اړوي او نه هم سولې ته. که د سولې خبرې سمې روانې وي، باید ملاتړ یې وکړي. که ناسمې وي، باید خلکو ته وضاحت ورکړي، هر څه روښانه کړي او له خلکو ملاتړ وغواړي.
