د سالنګ لویه لار لا هم تړلې ده؛ د واورې پاکولو عملیات روان دي

د ټولګټو چارو وزارت وايي چې د سالنګ لویه لار لا هم درنې واورې ورېدو، سخت توپان او د لید ساحې د محدودیت له امله، نه ده پرانیستل شوې او د پاکولو عملیات یې جریان لري. د ټولګټو وزارت ویاند محمداشرف حق شناس پر خپل اېکس‌پاڼه لیکلي چې د سالنګونو د ساتنې او څارنې ریاست پرسونل له تېرو درېیو ورځو راهیسې د یادې لارې په بېلابېلو برخو کې د واورو پاکولو چارې پیل کړې دي، چې تر دې دمه شاوخوا ۸۰ سلنه پاک ‌کاري بشپړه شوې ده. نوموړي ویلي، دا مهال د تونل اړوندو سیمو کې د واورې ورېدل یو ځل بیا پیل شوي او په ځینو برخو کې د واورې ښویېدو (برف ‌کوچونو) امکان هم شته. نوموړي له ټولو هېوادوالو او موټرچلوونکو غوښتنه کړې، څو چې د وزارت رسمي خبرتیا خپره شوې نه وي او د لارې د وضعیت او خوندیتوب په اړه ډاډ نه وي ورکړل شوی، پر یاده لار دې له سفر کولو ډډه وکړي.