په کابل کې د ۲۰۲۶ کال لپاره د چین او افغانستان د خلکو ترمنځ د اړیکو د پیاوړتیا په موخه د CGTN د پښتو څانګې خبریالې چین غوټۍ له لوري دوه مهم ویډیويي پروګرامونه جوړ شوي، چې ټاکل شوې چې د یو شمېر افغان تلویزیونونو له لارې خپاره شي.
د دغو پروګرامونو لومړۍ برخې د اکسوس کتاب پلورنځي کې په یوې غونډه کې نندارې ته وړاندې شوې، چې پکې د پوهنتون استادانو، لیکوالانو او ځوانانو ګډون کړی و. د پلورنځي مسوول صفي الله ناصري وویل، یو پروګرام د چینایي ژبې د زده کړې لپاره ځانګړی شوی چې د فبرورۍ له ۱۶مې نېټې به هره دوشنبه خپرېږي، او بل د غوټۍ درس تر سرلیک لاندې چمتو شوی چې د مارچ له ۳مې نېټې به هره سهشنبه پر سکرین راځي او په پښتو ژبه به بېلابېل معلومات وړاندې کوي.
ګډونوالو دغه نوښتونه د افغانانو لپاره ګټور وبلل او د چین له غوټۍ یې وغوښتل چې خپلو هڅو ته دوام ورکړي. همداراز، د فبرورۍ ۱۷مه چې د چین د کرنیزې جنترۍ له مخې د پسرلني جشن له ورځې سره برابره ده، په همدې تړاو یوه ځانګړې ویډیو هم نندارې ته وړاندې شوه او ګډونوالو چینایانو ته د نوي کال مبارکي وویله.
د یادونې وړ ده چې چین غوټۍ د ډیجیټل چین پروګرام هم پر مخ وړي او په ۲۰۲۵ کال کې یې د افغان ماشومانو لپاره دوه کتابونه هم لیکلي چې د لوستونکو له هرکلي سره مخ شوي دي.
