نن له افغانستانه د پخواني شوري اتحاد ځواکونو د وتلو ۳۷مه کلیزه ده

نن، د سلواغې ۲۶مه نېټه له افغانستانه د پخواني شوروي اتحاد د وتلو له اووه دېرشمې کلیزې سره برابره ده. که څه هم چې په افغانستان کې د پخواني شوروي اتحاد څه باندې نهه کلن حضور د دغه اتحاد د ړنګېدو لامل شو، خو په دغو جګړو کې نږدې دوه مېلیونه افغانان ووژل شول او زرګونه نور ټپیان شول. په دې جګړه کې د پخواني شوروي ۱۴زره پوځیان هم ووژل شول او له بلې خوا دا جګړه له سیاسي او مالي پلوه شوروي اتحاد ته له زیانه ډکه تمامه شوه. پر افغانستان د سره پوځ یرغل له هماغه پیله د ملګرو ملتونو له غبرګون سره مخ شو. د ۱۳۵۸ کال په سلواغې میاشت کې د دغه سازمان د عمومي اسامبلې په پرېکړه لیک کې له افغانستانه د دغو پوځيانو پر ژر وتلو ټينګار وشو. اووه دېرش کاله وړاندې د ۱۳۶۷کال د سلواغې پر شپږوېشتمه د وخت د شوروي اتحاد لښکرو د افغانستان او ازبکستان له سرحدي پولې واوښتل او په افغانستان کې یې خپل څه باندې نهه کلن حضور پای ته ورساوه، خو تر هغې وروسته په افغانستان کې کورنۍ جګړې پېل شوې.