د چين او بحرین خارجه وزيرانو د مارچ په نهمې نیټې ټیلیفوني خبرې کړې دي.
د بحرين خارجه وزیر عبداللطیف بن راشد الزياني چيني سيال ته د سيمې د وروستي وضعيت په اړه معلومات ورکړي او د خپل هېواد دريځ يې ورته بيان کړی دی او په ټکو يې، بحرين سوله خوښوونکی دی، چې باید نه وای په نښه شوی. نوموړي د چين عادلانه دريځ د قدردانۍ او مننې وړ بللی دی.
د چين خارجه وزیر وانګ يي ویلي، د خلیج وضعیت په چټکۍ سره مخ په سختېدو دی او د بحرین امنیت هم له خطر سره مخ دی، چې چین یې په اړه ژوره اندېښنه لري.
نوموړي د چین دریځ ثابت او روښانه بللی او په خبره یې، د ټولو هېوادونو حاکمیت، امنیت او ځمکنۍ بشپړتیا ته باید درناوی وشي او په ملکي وګړو او غیر نظامي اهدافو بریدونه باید وغندل شي.
وانګ يي تر ټولو بېړنی کار دا بللی، چې د شخړې ښکېل لوري سمدلاسه پوځي عملیات ودروي او د شخړې د لا خپرېدو مخه ونيسي.
نوموړي د رکود د ماتولو لارې ته هم اشاره کړې او ويلي يې دي، چې ښکيلې خواوې دې ژر تر ژره خبرو او مذاکراتو ته راستانې شي او د سولې لپاره دې هڅې وکړي.
