د چين د کمونېست ګوند د مرکزي کمېټې د سياسي بيورو غړي او بهرنيو چارو وزير وانګ يي د مارچ په ۱۰مه نېټه د قطر له صدراعظم او بهرنيو چارو وزير محمد بن عبدالرحمن الثاني سره تليفوني خبرې کړې دي.
محمد بن عبدالرحمن له وانګ یي سره د سيمې د وضعيت او د قطر د دريځ په اړه خبرې کړي او په ټينګار يې ويلي، چې قطر به د ځان دفاع کوي، خو په ورته وخت کې به ډيپلوماټيکې هڅې هم زياتې کړي، څو په سیمه کې د کړکېچ د خپرېدو او زياتېدو مخه ونيول شي.
نوموړي د چين د عادلانه درېځ او منځګړيتوب ستاينه کړې او هيله يې ښودلې چې چين به د اوربند او جګړې د ختمولو لپاره لا زيات رول ولوبوي.
وانګ يي ويلي، چين د ملګرو ملتونو د امنيت شورا د دايمي غړي په توګه په نړيوالو چارو کې پر اصولو ټينګار لري او د عدالت ملاتړ کوي.
نوموړي ويلي، امريکا او اسرائيل د ملګرو ملتونو د امنيت شورا له اجازې پرته پر ايران پوځي بریدونه کړي او د ملګرو ملتونو د منشور د اهدافو او اصولو او د نړيوالو اړيکو له اسياسي اصولو څخه یې څرګنده سرغړونه کړې ده.
وانګ يي زياته کړې، چين د بريدونو د ساحې له پراخولو سره موافق نه دی او پر ملکي وګړو او غير نظامي اهدافو بې توپيره بريدونه غندي او په خبره یې، د شخړې ښکېل لوري باید د خليج د عربي هېوادونو حاکميت، امنيت او ځمکنۍ بشپړتيا ته درناوی وکړي.
نوموړي زياته کړې، د جګړې دوام هېڅ ګټه نه لري او يوازې خلکو ته زيانونه اړوي او په ټکو يې، چين د بېړني اوربند، د سياسي حل لارې د لټولو او په سيمه کې د خليجي هېوادونو د برخليک ملاتړ کوي. چين به پر خپلې لارې د وضعيت د کمولو او د سولې د بيا رامنځته کېدو لپاره رغنده رول ولوبوي.
