د منځني ختيځ لپاره د چين د حکومت ځانګړي استازي جای جون د مارچ په لسمې نېټې په عربي متحده امارات کې د دغه هېواد له مرستيال صدراعظم او خارجه وزير عبدالله بن زاید ال نهیان سره ليدلي دي.
عبدالله بن زاید ال نهیان له جای جون سره د سيمې د اوسني وضعيت په اړه معلومات او په اړه يې د عربي متحده اماراتو دريځ څرګند کړی او ويلي يې دي، چې هېواد يې د جګړې اړخ نه دی او تل د سيمې د سولې او ثبات د ساتلو هڅه کوي، نو ځکه پر دغه هېواد باید بريد نه وای شوی.
نوموړي ويلي، عربي متحده امارات د چين له عادلانه دريځ څخه مننه کوي او د چين رول ته په درنه سترګه ګوري، دغه راز د چين د ځانګړي استازي د منځګړيتوب هرکلی کوي او غواړي چې له چين سره د سيمې د وضعيت د ارامولو لپاره ګډې هڅې وکړي.
جای جون له عبدالله بن زاید ال نهیان سره په خبرو کې ويلي، چين په ګرد خلیج کې د جګړې د لمنې د پراخېدو له امله ډېر اندېښمن دی او په خبره یې، د خليجي هېوادونو حاکميت، امنيت او ځمکنۍ بشپړتيا ته باید درناوی وشي او ټول هغه عمليات چې ملکي وګړي او غير نظامي هدفونه پکې په نښه شوي، باید وغندل شي.
جای جون د سيمې تاوتريخوالی د هيڅ لوري په ګټه نه دی ياد کړی او اوربند او د جګړې درول يې له اوسني ستونزمن وضعیت څخه د وتلو اصلي لار بللې ده او په خبره به یې، چين به له عربي متحده اماراتو سره همغږي پیاوړې کړي او ښکېلې خواوې به وهڅوي، چې په سیمه کې جګړه ودروي.
