د چین د ۱۴م ملي ولسي کانګرېس د څلورمې غونډې د پای ناسته د مارچ د ۱۲مې نېټې په ماسپښين په پلازمېنې بېجينګ کې ترسره شوه.
د چين په سږنیو دوو غونډو کې د حکومت د کاري راپور، د ۱۵م پنځه کلن پلان، د ايکولوژۍ او چاپېریال قانون، د د قومي يووالي او پرمختيا د هڅونې قانون او د ملي پرمختګ د پلان قانون په شمول يو لړ قوانین تصویب شوي دي.
نړیوالو رسنیو ويلي، د چین دوه لویې غونډې نه یوازې د دغه هېواد راتلونکی عمل او کړنې روښانه کوي، بلکې د بېلا بېلو هېوادونو د ګډې سوکالۍ د ترلاسه کولو لپاره نقشه هم جوړوي.
برازیلي رسنۍ په يوې ليکنې کې ويلي، چین په عمل کې اوږدمهاله پلان پلی کوي او په پای کې د نړۍ لپاره د پرمختګ یو ماډل برابروي.
د چین دولت رئیس شي جين پینګ د دوو لویو غونډو په ترڅ کې د جيانګ سو ولايتي پلاوي په بحثونو کې د ګډون پر مهال ويلي، چې د ښه پلان جوړونه باید په عمل کې هم وښودل شي او چارې باید تعقیب شي او په خبره یې، چين سالم پلان جوړوي او په پياوړې ارادې يې تطبیق کوي.
د چین د ۱۴م پنځه کلن پلان په طرحه کې ټاکل شوي ۲۰ عمده شاخصونه، ۱۷ لویې ستراتیژیکې دندې او ۱۰۲ مهمې پروژې بشپړې شوې دي.
د امریکا او چین د همکارۍ صندوق اجرائیوي رئیس جان ملیګان وایټ په نظر، د منځمهاله او اوږدمهاله پراختیایي پلانونو په قانوني سیسټم کې د چین بریالۍ تجربې د حکومتولۍ د موثریت لپاره ګټورې دي، چې دا اقتصادي او ټولنیز پرمختګ نور هم ډاډمنولی شي.
د چين د پاليسۍ د څېړنې په اړه د هسپانیې يوې ویبپاڼې خبر ورکړی، چې چین د قوانینو له لارې د پالیسۍ دوام تضمینوي او د پرمختيايي هېوادونو لپاره مهمه بېلګه جوړوي.
د چین دولت رئیس شي جين پينګ د نوي کیفیت د تولیدي ځواکونو پرمختګ د باکيفيته پرمختګ د هڅولو او اقتصادي سیالۍ د توان د لوړولو لپاره ډېر مهم بللی دی.
د یادونې ده، د چين د حکومت په سږني کاري راپور کې په لومړي ځل د ځيرک اقتصاد د نوې بڼې د جوړولو یادونه شوې ده. دا په دې مانا ده، چې مصنوعي ځیرکتیا به د لوړ کیفیت د پرمختګ لپاره قوي حیاتي ځواک وګرځي.
برسېره پر دې، د چين په سږنيو دوو غونډو کې د ايکولوژۍ او چاپېریال قانون هم تصویب شوی، چې د ډېرو پاملرنه یې راجلب کړې ده.
چين به په راتلونکو ۵ کلونو کې د انسانانو د ګډ برخلیک ټولنې ابادۍ ته وده ورکړي، ۴ لوی نړیوال نوښتونه به پلي کړي، په نړیوالې اقتصادي حکومتولۍ کې به فعاله برخه واخلي او نړۍ ته به لازیات عامه توليدات برابر کړي.
