د چين د کمونېست ګوند د مرکزي کمېټې د سياسي بيورو غړي او بهرنيو چارو وزير وانګ يي د مارچ په ۱۳مه نېټه د افغانستان د بهرنیو چارو وزیر امير خان متقي په بلنې ورسره تلیفوني خبرې کړې دي.
متقي د افغانستان او پاکستان ترمنځ د شخړې د منځګړیتوب لپاره د چین د مثبتو هڅو مننه کړې او ويلي يې دي، چې افغانان له جګړې څخه ډېر ځورېدلي وو او سولې او د پرمختګ فرصتونو ته ارزښت ورکوي. افغان لوری په دې باور دی چې خبرې اترې او مشورې د مسئلو د حل یوازینۍ لاره ده او دې ته سترګه په لار دي چې چین د يوه لوی هېواد او دوست ګاونډي په توګه لا ستر رول ولوبوي.
وانګ یي له متقي سره تلیفوني خبرو کې ويلي، د سيمې هېوادونه بايد د ګډوډ بهرني چاپېریال پر وړاندې د ستونزو د لرې کولو لپاره ګډې هڅې وکړي او د همکارۍ له لارې ګډ امنيت ومومي.
وانګ يي زياته کړې، چې افغانستان او پاکستان نه بېلېدونکی وروڼه او ګاونډیان دي او د دواړو هېوادونو ترمنځ ستونزې یوازې د خبرو اترو او مشورو له لارې حل کېدای شي. وانګ يي زور د ترينګلتيا او شخړې د سختېدو سبب بللی او په خبره يې، زور به هېڅ لوري ته ګټه ونه رسوي او سیمه ييزې سولې او ثبات ته به ګواښ ورسوي. چین تل د افغانستان او پاکستان د شخړې په اړه پر عیني او بې طرفه دریځ ټينګار کړی. د افغانستان د چارو په اړه د چین د بهرنيو چارو وزارت ځانګړی استازی د افغانستان او پاکستان په منځګړیتوب بوخت دی. وانګ يي هیله ښودلې چې دواړه خواوې زغم وساتي، ژر تر ژره مخامخ خبرې اترې وکړي، ژر اوربند ته ورسېږي او د خبرو اترو له لارې اختلافات حل کړي. چین به د افغانستان او پاکستان ترمنځ د پخلاینې او د اړيکو د ښه والي لپاره مثبتې هڅې وکړي.
وانګ يي او متقي په تلیفوني خبرو کې د ایران د وضعیت په اړه هم د نظريو تبادله کړې ده.
