کله چې لوېديځ هېوادونه د ټولټاکنو وخت ته ننوځي، نو خبري رسنۍ، ملکي خلک او نړيواله ټولنه ورته ډېره پاملرنه اړوي. ځکه ټول پر دې پوهېږي چې د ټولټاکنو پايله د هېواد پر راتلونکي پرمختګ مهمه اغېزه لري. خو د چين دوه ملي غونډې، چې د هر کال په پسرلي کې ترسره کېږي او د ټول هېواد تر څار لاندې مهمې سياسي پېښې يادېږي او ارزښت يې د لوېديځو هېوادونو له ټولټاکنو سره برابر دی، له اوږدې مودې راهيسې د لوېديځو عامه افکارو له سوتفاهم او نيوکو سره مخ دي.
په حقيقت کې د چيني چارو نړيوال کارپوهان دغه دوه ملي غونډې د چين د پېژندنې لومړۍ مهمه کړکۍ بولي.
د دوی په نظر د چين له دوو ملي غونډو څخه د دغه هېواد پرمختيايي لوری، د تګلارو منطق، د عامو خلکو پاملرنه معلومېږي او دا د چين د سياسي او ټولنيزو چارو د پرمختګ د څار تر ټولو مستقيم او صلاحیت لرونکی فرصت دی.
د دوو ملي غونډو پيغامونه د ۱.۴ ميليارډو چينايانو په ژوند پسې نژدې تړاو لري.
د چين دوه ملي غونډې «ملي ولسي کانګرېس او ولسي سياسي مشورتي کنفرانس» د کال د پرمختيايي چارو مباحثوي ډګر بلل کېږي، چې پيمانې يې لويې او موضوعات يې په مختلفو چارو پسې تړاو او پراخې اغېزې لري.
د دغو غونډو ګډونوال د مختلفو ټولنو او سیمو استازيتوب کوي، چې د ساري په توګه یې له بېوزلۍ څخه د کليوالو د وتلو په هڅه کې د چين د کمونېست ګوند د کليوالي کمېټو منشيان، د تخنيکي ستونزو د ليرې کولو په برخه کې هڅاند ساينسپوهان، د کتونکو د خوښې وړ هنرمندان، د استوګنيزو سيمو حکومتي کارکوونکي او ځيني نور یادولی شو.
د چين د دوو ملي غونډو زرګونه استازي او غړي د حکومت کلنی راپور څېړي او د بوديجې مسوده يې څاري او د قوانينو پر تعديل نامو بحثونه او د خلکو د ژوند اړوندو چارو په اړه وړانديزونه کوي. دا ټول په مشخصو تګلارو، قوانينو او مالي ترتيباتو بدلېدای شي او په راتلونکي کال يا په اوږدمهال کې د چين پر پرمختګ اغېزه کوي.
د عامو چينايانو په نظر، د چين دوه ملي غونډې يوازې يوه سياسي ښودنه نه ده، بلکې دا د هر تن په ژوند پسې تړلې مهمې غونډې دي. د کورونو د بيې، ښوونې، طب، د عمرخوړلو پالنې، استخدام او سفر په باره کې هره مسوده او وړانديز د خلکو ژوند پسې نږدې تړاو لري او د عامو خلکو تمې او هيلې ورپسې غوټه وي. د مثال په توګه، د سږ کال د دوو ملي غونډو په موده کې ځينو استازيو او غړو د ابتدايي او منځنيو ښوونځيو پر زده کوونکو د بارونو د کمولو او د لوړې کچې ښوونځيو ته د داخلې ستونزو ته پام کړی، ځينو يې د طبي سرچينو د غوره والي هڅونه کړې او ځينو يې دا نظر ورکړی، چې کليوالو اوسېدونکو ته دې د ټولنيزې بيمې پيسې لوړې شي.
دا بېځايه خبرې نه دي، د کومو سياسي ډلو يا ګوندونو پر ضد غندنې يا نيوکې نه دي، بلکې دا يوازې د واقعي ستونزو د ليرې کولو احتمالي لايحې او وړانديزونه دي. همدا د چين د دوو ملي غونډو رښتينې بڼه ده.
د چين په دوو ملي غونډو کې د عامو خلکو پاملرنې او هيلې څرګندېږي او د حکومت تګلارې پکې تعديلېږي. دلته نه يوازې د چين ستراتيژي ټاکل کېږي، بلکې د خلکو د ژوند ښه والی هم پکې هڅول کېږي.
د چين دوه ملي غونډې دغه هېواد ته ”د بدني معاينې کلنی راپور“ او ”د راتلونکي پرمختګ نقشه“ په څېر ارزښت لري.
