د افغان سولې لپاره د امریکا ځانګړی استازی زلمی خلیلزاد په کابل کې دی. له ځینو چارواکو او سیاستوالو سره یې کتلي او له ځینو نورو سره به هم وګوري. په دغو لیدنو کې ځینې به یې رسنیزې شي او ځینې به پتې وي او خلک به ترې خبر نه شي. ټاکل شوې چې خلیلزاد پاکستان او بیا قطر ته ولاړ شي او هلته له طالبانو سره خبرو ته دوام ورکړي.
خلیلزاد له هغه وروسته کابل ته راځي، چې د ملي یووالي حکومت د ملي امنیت سلاکار حمدالله محب پر نوموړي توندې نیوکې کړې دي او هغه یې تورن کړی، چې شخصي اجنډا لري او غواړي په افغانستان کې خپل ځان واک ته ورسوي. که څه هم امریکايي چارواکو حمدالله محب ته توند ځواب ورکړی او له دې امله حکومت هم تر فشار لاندې دی، خو اوس وخت دی چې د سولې د روانې پروسې په تړاو را پورته شوې پوښتنې، شکونه او اختلافات حل شي.
په دې کتنه کې باید خلیلزاد د خپلې شخصي اجنډا او تورونو په اړه له چارواکو سره بحث وکړي او خبره واضح شي. ولسمشر باید په روښانه ډول هغه ټکي خلیلزاد ته ووايي، چې دوی ترې وېرېږي. خلیلزاد هم باید له خپله اړخه هر څه واضح کړي او ټولو هغو پوښتنو او شکونو ته له خپله اړخه ځواب ووايي، چې د سولې د روانو خبرو په اړه را پیدا شوي دي. د خلیلزاد په دغه سفر کې باید له افغان حکومت سره را پورته شوی اختلاف حل شي، ځکه دا چاره له یوه اړخه د سولې پر وړاندې خنډ پیدا کوي او له بله اړخه به افغاني ګټو ته هم زیان واړوي. حکومت باید خلیلزاد ته هغه څه مخامخ او په روښانه ډول ووايي، چې دوی یې په دې وروستیو کې تبلیغوي او له خلیلزاد څخه یې ځواب وغواړي. بله ستونزه چې په دغه سفر کې باید حل شي، هغه د افغان حکومت او طالبانو ترمنځ د مخامخ خبرو بحث دی. لا هم طالبان له حکومت سره مخامخ خبرو ته نه حاضرېږي او حکومت بیا نه مني چې استازي یې دې په نادولتي پلاوي کې ولاړ شي او له طالبانو سره دې وګوري. د مخامخ خبرو د پیل لپاره باید حکومت هم پلاوی بدل کړي، د حکومت پلاوی کمزوری او وړ نه دی. د دغه پلاوي د بدلون لپاره افغانانو غږ پورته کړی او بهرنیانو هم غوښتنه کړې، خو حکومت دا کار نه دی کړی. اوس پکار ده چې دا چاره هم وروستۍ شي او په دغه سفر کې حل شي. بله ستونزه چې په دغه سفر کې پرې بحث شوی او کېږي، هغه په قطر کې د افغانانو وروستۍ خپلمنځي غونډه ده، چې لا یې حکومت مخالف دی او ځینې نور کسان هم پرې نیوکې لري.
خلیلزاد به له پاکستاني چارواکو او بیا طالبانو سره خبرو ته دوام ورکوي، خو پکار ده چې له افغان لوري یو واضح پیغام ولري او له دې اړخه هر څه روښانه او واضح وي. که خبره د پخوا په شان پر اختلاف، بدګومانۍ او شکونو ولاړه وي، نو بیا به د سولې روانې خبرې له خنډ او ځنډ سره مخ شي، چې زیان یې تر بل هر چا ډېر افغانستان او افغانانو ته اوړي.
