ایران یوځل بیا هرمز تنګی وتاړه

د امریکا مرکزي قومندانۍ (سنټکام) ویلي، په هرمز تنګي کې پر یوې سوداګریزې بېړۍ د برید په غبرګون کې یې د ایران پر ځینو هدفونو تازه بریدونه کړي دي. سنټکام په خپره کړې خبرپاڼه کې ادعا کړې، هغه سوداګریزه بېړۍ چې د قبرس بیرغ یې لېږداوه، په هرمز تنګي کې تر برید لاندې راغلې وه. بل لور ته، د ایران سپاه پاسداران ویلي، وروسته له هغې چې یوې کښتۍ د دوی په وینا له یوې “نا تایید شوې” لارې د هرمز تنګي د تېرېدو هڅه وکړه او په نښه شوه، دغه تنګی یې تړلی دی. د سپاه پاسدارانو سمندري ځواک خبرداری ورکړی، که هر ډول برید پرې وشي، مناسب او سخت غبرګون به وښيي.