د ایران سپاه پاسدران وايي، د سوریې د فرات ختیځ ته یې هغه سیمه په څو بالستیک توغندیو ویشتلې ده چې د اهواز برید پلانوونکو مرکز پکې دی.
د ایران دولتي رسنۍ وايي، سپاه پاسدران په بیانیه کې زیاتوي چې دغه برید کې یې ګڼ شمېر ترهګر وژلي دي.
د دغه رپوټ له مخې برید پرون سهار وختي شوی او پکې له ځمکې – ځمکې ته توغېدونکي بالستیک توغندي کارول شوي دي.
که څه هم سپاه د توغندیو د توغولو ځای نه ښيي، خو د پنځو ګوزار شویو توغندیو ویډیوګانې په ټوېټر کې خپرې شوې او ادعا کېږي چې له کرمانشا توغول شوي دي.
د سپټمبر پر ۲۲ مه د ایران په اهواز کې وسله والو پر پوځي پرېډ برید وکړ چې له امله یې د سپاه پاسدران د ۱۲ غړو په ګډون لږ تر لږه ۲۵ کسان ووژل او نږدې ۵۰ کسان ټپیان شول.
ویل کېږي د هغه برید دوه وسله وال وژل شوي او دوه نیول شوي وو.
له برید یوه ورځ وروسته داعش یا اسلامي دولت ډلې د بریدګرو ویډیو خپره کړه چې له برید مخکې ریکارډ شوې وه او ادعا یې وکړه دا حمله دوی کړې ده.
د ایران د استخباراتو وزارت له هغه برید دوه ورځې وروسته وویل چې په دې تړاو یې ۲۲ کسان نیولي دي.
د دغه وزارت په خبرپاڼه کې راغلي وو: «په پېښه کې ښکېل او ملاتړي ۲۲ کسان هم نیول شوي دي. په دې برخه کې د دې ترهګریز برید بهرني ملاتړي او لارښوونکي هم پېژندل شوي».
ایراني چارواکو دا هم ویل، چې د نیول شویو کسانو په کورونو کې یې باروت، پوځي وسایل او اړیکتیايي الې هم موندلې او ضبط کړې دي.
د ایران مذهبي مشر ایت الله علي خامنه يي له برید دوه ورځې وروسته د دې برید عاملان په سعودي او اماراتو پورې تړلي وبلل.
هغه یوې غونډې ته په وینا کې وویل: «د رپوټونو له مخې دا کار د هغو ډارنو دی چې سوریه او عراق کې نیول کېږي، امریکا یې ژغوري او لاسونه یې د سعودي او عربي اماراتو په جیب کې دي».
د ایران ولسمشر حسن روحاني کوم هېواد ته له ګوتې نیولو پرته وویل، روښانه ده چې دا برید چا کړی دی.
خو د دغه هېواد د بهرنیو چارو وزیر جواد ظریف د پېښې په ورځ وویل، د ترهګرۍ ملاتړي سیمه ییز لوبغاړي او امریکايي استادان یې باید ځواب ووايي.
امریکا او اماراتو په دغه برید کې لاس لرل رد کړي دي.
