په قطر کې د بینالافغاني مذاکراتو له ناکامۍ وروسته وېره ده، چې ښايي تاوتریخوالی او جګړه لا زیات شي. وړمه شپه په وردګو کې ګډو ځواکونو عملیات کړي، چې د ښځو او ماشومان په ګډون یې شپږ ملکي وګړي وژلي دي. پرون بیا پر مخابراتو وزارت ډله ییز برید وشو، چې زموږ هېوادوالو ته پکې مرګ ژوبله اوښتې ده. له نورو ولایتونو هم د نښتو او تاوتریخوالي خبرونه ورکړل شوي دي.
که څه هم پر مخابراتو او معلوماتي ټکنالوژۍ برید داعش ته منسوب شوی او طالبانو پکې ښکېلتیا رد کړې ده، خو له دغو بریدونو سره دا وېره را پیدا شوې ده، چې په ښارونو کې به بریدونه ډېر شي. له طالبانو سره د خبرو له پیل وروسته، په ښارونو کې یا بریدونه نه دي شوي او یا هم کم بریدونه شوي، چې دې ډېریو پړه یې طالبانو پر غاړه نه ده اخیستې. په ښارونو کې د بریدونو کموالی هغه څه وو، چې خلکو یې هرکلی کړی و او تمه وه چې په کلیوالو سیمو کې به هم تاوتریخوالی را کم شي او شپني عملیات به هم ودرول شي او یا به کم شي.
تمه وه چې په قطر کې به له بینالافغاني غونډې وروسته، په تاوتریخوالي کې لا زیات کموالی راشي. که څه هم د رسمي اوربند شونتیا نه وه، خو فکر کېده چې د قطر غونډې ګډونوال به له طالبانو او حکومت څخه وغواړي، چې تاوتریخوالی را کم کړي. دا اټکل هم کېده چې له دې غونډې وروسته به جګړه کمه شي. اوس چې دا غونډه ځنډېدلې او داسې څرک هم نه لیدل کېږي، چې په نږدې راتلونکې کې به وشي، نو نه یوازې د خلکو هیله کمه شوې، بلکې وېره زیاته شوې ده چې تاوتریخوالی به زیات شي. دواړه لوري پر یو بل پړه اچوي، چې د قطر غونډه یې وځنډوله او دواړه لوري اوس د دې لپاره چې یو بل ته وښيي چې زور لري، ښايي تاوتریخوالی زیات شي.
د خلکو تمه دا ده چې د جګړې ښکېل لوري د بینالافغاني تفاهم او خبرو پر وړاندې خنډونه جوړ نه کړي. له بده مرغه هڅه وشوه چې دا غونډه ونه شي. حکومت پر خپل دریځ ټینګار کوي او غواړي چې رسمي پلاوی یې قطر ته ورشي او له طالبانو سره مخامخ خبرې وکړي. طالبان بیا پر خپل دریځ ټینګار کوي او وايي چې له حکومت سره خبرې نه کوي. همدې چارې ستونزه جوړه کړې ده. اوس یوه درېیمه لاره هم پیدا کېدلی شي، خو د دې لپاره دواړه لوري باید پر ځينو شرطونو سترګې پټې کړي او خنډونه کم کړي. دوی اوس باید ډېره هڅه وکړي چې له خپله اړخه تر پخوا لا زیاته نرمي وښي. د خپلمنځي غونډې او تفاهم لپاره له خپلو شرطونو او دریځونو تېر شي او پرېږدي چې افغانان په خپلو منځو کې سره کښېني، خبرې وکړي او فاصلې کمې کړي. څومره چې د خبرو، تفاهم او جوړجاړي پر وړاندې خنډونه پیدا کېږي او مخه یې نیول کېږي، په همغه کچه جګړه زیاتېږي او څوک چې دا خنډونه جوړوي، د جګړې د دوام غوښتونکي او د افغان ولس دښمنان دي.
