کورنیو چارو وزارت وايي چې د مشرانو جرګې د رییس فضل الهادي مسلمیار سلاکار حاجي دلاور د امنیتي ځواکونو له خوا ونیول شو. سرچینه وايي، حاجي دلاور د ترهګرو ملاتړ کاوه چې ورسره جعلي نمبر پلېټونه، وسلې، زرې موټر او څو پاکستاني شناخت کارټونه نیول شوي دي. معلومه نه ده چې حاجي دلاور د ښاغلي مسلمیار اوسنی او که پخوانی سلاکار و. له دې سره یو ځل بیا د چارواکو او ترهګرو ترمنځ د اړیکو په تړاو اندېښنې او پوښتنې را پیدا شوې دي.
دا لومړی ځل نه دی چې ښاغلي مسلمیار ته نږدې کسان له ترهګرو سره د مرستې په تور نېول کېږي. تر دې وړاندې هم داسې اوازې خپرې شوې، چې د مسلمیار نږدې کسان له ترهګرو سره اړیکې لري او ملاتړ یې کوي. دا خبرونه تل د اوازو په حد کې پاتې شوي او په رسمي ډول نه دي تایید شوي. یو کال وړاندې په ټولنیزو رسنیو کې د یوه بندي داعشي ویډیو خپره شوه، چې د مسلمیار او داعش د اړیکو په اړه اوږدې خبرې کوي. معلومه نه وه چې دا ویډیو چا خپره کړې ده او څومره سمه ده. تر دې وړاندې ویل شوي وو چې د مسلمیار د ورور له کوره ځانمرګي او د ځانمرګو واسکټونه نیول شوي. دغه راز مسلمیار د ځینو هغو کسانو په خوشي کولو تورن شوی و، چې له داعش او نورو ترهګرو سره یې مرسته کړې وه او حکومتي ځواکونو نیولي وو. دا یوه پېښه هم نه رسمي سرچینو تایید او نه یې هم رد کړه، بلکې د اوازو په حد کې پاتې شوه. وروستۍ پېښه دا ده چې حاجي دلاور نیول کېږي. اوس له خلکو سره جدي پوښتنې دي چې د حاجي دلاور او مسلمیار اړیکه څه ده؟ دوی څنګه سره وپېژندل او څنګه بیا دلاور د مسلمیار سلاکار شو؟ د کومې وړتیا پر اساس سلاکار ټاکل شوی و؟ ایا مسلمیار نه پوهېده چې حاجي دلاور له ترهګرو سره اړیکې لري؟ د مسلمیار او جاجي دلاور ترمنځ له رسمیاتو ور هاخوا نورې څه اړیکې وې؟ ایا له حاجي دلاور سره په دغو کارونو کې ښاغلي مسلمیار مرسته کړې ده؟ مسلمیار د خپل سلاکار په تړاو معلومات له امنیتي ادارو سره شریک کړي وو؟ …؟؟؟
دا او دې ته ورته جدي پوښتنې شته چې حکومتي چارواکي یې باید په تړاو ولس ته ځواب ووايي. په دې اړه باید له ښاغلي مسلمیار نه وپوښتل شي او واضح شي چې رښتیا څه دي. که په دې چاره کې ښاغلی مسلمیار پړ وي، نو پکار ده چې حساب کتاب ورسره وشي او که پړ نه وي، نو پکار ده چې د هغه سپیناوی وشي او دا ابهام ختم شي.
د دولتي چارواکو او ترهګرو ترمنځ د اړیکو خبرونه له پخوا دي. ویل کېږي چي ځینې چارواکي د ترهګرو ملاتړ کوي. وسلې، پیسې او تجهیزات ورکوي او په خپلو زرې او تورو ښیښو لرونکو موټرونو کې یې لېږدوي. د ملي امنیت شورا پخوانی سلاکار دین محمد جرئت هم تورن و، چې په ننګرهار کې یې له دفتره ځانمرګي او واسکټونه نیول شوي. پخوا ځیني نور چارواکي هم تورن شوي وو، خو دا یوه پېښه هم په جدي ډول نه ده څېړل شوې او که څېړل شوې هم وي، پایلې یې له ولس سره نه دي شریکې شوې. له همدې امله اوس خلک پر حکومتي چارواکو باور نه لري او د څو ترهګرپالو چارواکو له امله پر ډېرو نورو سمو چارواکو هم له ترهګرو سره د اړیکو تورونه دي.
