درېیمه ورځ ده چې وسله والو طالبانو د کابل- کندهار لویه لاره تړلې ده. دوی وايي چې دا لاره یې د حکومت پر مخ تړلې، خو ملکي وګړي هم نه شي کولی چې پرې تګ راتګ وکړي. دوی وړمه شپه په همدې لاره د سیداباد پر ولسوالۍ برید وکړ، د امنیه قوماندان په ګډون یې ۱۴ پولیس ووژل او ولسوالي یې ونیوله. دغه راز یې په غزني کې هم پر پوستو بریدونه کړي او په لاره کې یې خنډونه جوړ کړي دي.
د طالبانو د بریدونو او د دغو بریدونو د څرنګوالي او ځایونو په تړاو له وړاندې معلومات وو. وسله والو طالبانو خپله اعلامیه خپره کړه چې دا لاره بندوي، خو حکومت نه دی توانېدلی چې د دغو بریدونو مخه ونیسي او لاره پرانیزي. د دغه ډول پېښو پر مهال معلومېږي چې دا حکومت څومره بې نظمه او ناسمه جګړه پر مخ وړي. دوی پر هغو ځایونو تمرکز نه کوي چې هلته ګواښ وي. اوس جګړه په سیداباد کې وه، خو دوی د پکتیا په ګرده څېړۍ کې پر ملکي وګړو هوايي برید کړی دی. په سیداباد کې ګڼ وسله وال را ټول شول او ډلې ډلې روان وو چې پر ولسوالۍ برید وکړي، خو نه هوايي ځواک وکارول شو او نه هم مرستندوی ځواکونه سیداباد ولسوالۍ ته ورسېدل. ولسوالي سقوط شوه، وسله والو د امنیه قوماندان په ګډون ۱۴ پولیس ووژل، وسلې، تجهیزات او نور وسایل یې له ځان سره یووړل. ګواښ معلوم و، د ګواښ ځای هم معلوم و، خو هېڅ ونه شول. د دې پر خلاف بیا د همدې ولایت په جغتو ولسوالۍ کې ۱۳ ملکي وګړي په هوايي برید کې وژل کېږي. برید په داسې ځای کې څو ورځې وړاندې وشو، چې نه حکومتي واکمني شته او نه هم هلته کوم ګواښ. د همدې سیداباد ولسوالۍ په تنګي دره کې چاپې وي، د خلکو کورونه نړول کېږي او بې ګناه خلک وژل کېږي، خو د ګواښ پر مهال بیا نه د چاپې څرک وي او نه هم د هوايي برید او مرستندویو ځواکونو. چېرته چې د برید اړتیا نه وي، هلته برید کېږي او چېرته چې د برید او مرستې اړتیا وي، هلته بیا برید او مرسته نه کېږي.
اوس چې د کابل- کندهار د لویې لارې د تړلو درېیمه ورځ ده، داسې نه ښکاري چې امنیتي ځواکونه ژر دا لاره پرانیستلی شي. له همدې امله به خلک په ستونزو کې وي، تر ټولو مهمه لاره به بنده وي، خلک به تګ را تګ نه کوي او زرګونه انسانان به په ستونزو کې وي. که له یوه اړخه د حکومت بې کفایتي او کمزوري ده، له بله اړخه طالبان هم له بده مرغه پر حکومت د فشار لپاره له ناوړو لارو کار اخلي. د لویو لارو بندول د ټولو اسلامي او منل شويو قوانینو او اصولو خلاف کار دی. طالبان استدلال کوي چې دا کار د ملکي وګړو د خوندیتوب لپاره کوي، خو دې ته نه ګوري چې تر ټولو لویه اکمالاتي لاره یې تړلې، د خلکو ورځنی ژوند خراب شوی او اقتصادي زیان اوړي. دغه راز پر دغه لاره تلونکي مسافر په کابل، کندهار او نورو سیمو کې بند دي، چې پکې ښځې، ماشومان او سپین ږیري هم دي. طالبان پر دې هر څه پوهېږي، خو بیا هم لویې لارې تړي چې حکومت تر فشار لاندې راولي.
وسله والو طالبانو ته پکار ده چې پر ملکي وګړو د فشار له لارې پر حکومت د فشار هڅه ونه کړي او نور دا ډول کړنې بندې کړي. حکومت ته هم پکار ده چې د خلکو د سر په خوندي کولو او د لویو لارو په امنیت کې جدي وي او نور دا ډول بې کفایتۍ پرېږدي.
