پرون په کابل کې د دفاع وزارت په یوه اړونده اداره وسله وال برید وشو، چې پکې لویه مرګ ژوبله ملکي وګړو ته واوښتله. برید له ملکي وګړو په یوه ډکه سیمه کې شوی، چې د ځاني زیانونو تر څنګ یې پراخ مالي زیانونه هم اړولي دي. طالبانو د برید مسوولیت منلی دی. تر دې وړاندې ګډو ځواکونو وړمه شپه په وردګو کې پر یوه مدرسه برید کړی و او نهه ماشومان یې پکې وژلي وو.
دا بریدونه له څو اړخونو د اندېښنې وړ دي. لومړی دا چې ډېری ملکي وګړي پکې وژل کېږي. کله چې د ملکي خلکو د کورونو او یا له ملکي خلکو په ډکه سیمه کې یو داسې هدف وي چې وسله وال طالبان او یا حکومت او امریکا پرې برید کوي، نو واضح ده چې ملکي وګړو ته مرګ ژوبله اوړي. که د جګړې له ښکېلو اړخونو سره لږ هم د ارزښتونو بحث مطرح وي او د ملکي وګړو ژوند ورته مهم وي، نو باید دا برید ونه کړي. هېڅ هدف د دوی دغه بریدونه نه شي توجیه کولی. پرون طالبان ښه پوهېدل چې د دوی د موخې شاوخوا ټول ملکي وګړي اوسیږي، د استوګنې بلاکونه دي او آن ښوونځي دي، خو بیا یې هم برید وکړ. برید لومړی په یوه ستره چاودنه پیل شو، چې ډېر خلک یې ټپیان کړل. دوی ښه پوهېدل چې د ملکي وګړو په منځ کې دا ډول برید پراخ ملکي تلفات لري، خو بیا یې هم برید وکړ. همداسې حکومتي او امریکايي ځواکونه هم همدا کار کوي. په نیمه شپه په یوه کور ور وغورځي، که ښځه، ماشوم یا بل هر څوک په مخه ورشي، وژني یې. دوی د یوه طالب لپاره پر ټول کور او کلي بمونه غورځوي. د یوه وسله وال طالب لپاره پوره دیني مدرسه او یا هم د ملکي وګړو موټر بمباروي او ډېر ملکیان پکې وژني. دوی ښه پوهیږي چې په کلي کې ملکیان وي، دوی ښه پوهیږي چې د دوی د برید په سیمه کې ملکیان شته، خو بیا هم د ملکیانو ژوند ته پام نه کوي او برید کوي. دا وحشت دی چې له هېڅ لوري او په هېڅ ډول نه شي توجیه کېدلی.
د دغو بریدونو بل زیان دا دی چې د سولې پر روانو خبرو منفي اغېز کوي. د سولې د خبرو پر مهال که داسې بریدونه کېږي، نو دا پر سوله منفي اغېز کوي. که امریکا له طالبانو سره خبرې کوي، خو په کلیو کې پر خلکو درانه بمونه غورځوي، نو دا ښکاره کوي چې دوی په سوله کې صادق نه دي. همداسې که طالبان له امریکا سره خبرې کوي، خو په کابل کې د ملکي وګړو د اوسېدو په ځای کې بریدونه کوي، نو دا د سولې ضد خوځښت دی چې د سولې لپاره د دوی پر اراده شکونه زیاتوي.
دواړو اړخونو ته پکار ده چې تاوتریخوالی را کم کړي. که په بله برخه کې نه وي، لږ تر لږه د ملکیانو دا ډول وحشیانه وژنې باید ودریږي. د ملکي وګړو له ګڼې ګوڼې په ډکه سیمه کې باید بریدونه ودرول شي او نور د ملکیانو له ژوند سره دومره بې توپیره چلند ونه شي.
