امریکا له سعودي عربستانه غوښتي چې د دغه هېواد د تري تم شوي خبریال په اړه رښتینې او رڼې څېړنې وکړي.
وروسته له هغې چې د امریکا ولسمشر ډونالد ټرمپ د سعودي عربستان د خبریال او د سعودي پر واکمن رژیم د منتقد جمال خاشقجي پر تري تم کېدو اندېښنه ښکاره کړه، د امریکا د بهرنیو چارو وزیر مایک پامپیو له سعودي عربستان څخه چې په سیمه کې د امريکا نږدې متحد دی، وغوښتل چې په دې اړه دې رښتنیې او رڼې څېړنې وکړي.
خاشقجي چې د امريکا استوګن و او له واشنګټن پوسټ ورځپاڼې سره یې همکاري کوله، د سعودي د ولیعهد شهزاده محمد بن سلمان په اړه یې انتقادي مطالب خپرول.
هغه له خپلې ترکۍ ملګرې سره د واده کولو په نیت د ځینو اسنادو د اخیستو لپاره د اکټوبر پر دويمه په استانبول کې د سعودي عربستان کونسلګرۍ ته تللی و چې له هغې راهیسې یې مړی او ژوندی نه دی لیدل شوی.
ترکي چارواکو ادعا کړې چې خاشقجي د کونسلګرۍ د ودانۍ دننه وژل شوی، خو ریاض دا ادعا رد کړې او ویلي یې دي چې هغه له ودانۍ وتلی دی.
د امریکا د بهرنیو چارو وزیر مایک پامپیو په یوه خپاره کړي بیان کې ویلي چې د سعودي عربستان له حکومته غواړي چې د خاشقجي د تري تم کېدو د قضیې په اړه د شفافې څېړنې ملاتړ وکړي داسې څېړنې چې نتیجه یې شفافه وي.
پامپیو زیاته کړې چې د امريکا د جګپوړو ډیپلوماتیکو چینلونو له لارې یې د سعودي عربستان له چارواکو سره د دې قضیې په اړه خبرې کړې دي.
پامپیو دا څرګندونې وروسته له هغې کوي چې ولسمشر ټرمپ د دوشنبې په ورځ په سپینه ماڼۍ کې خبریالانو ته وویل چې دی په دې اړه اندېښمن دی.
ټرمپ ویلي، لېواله نه دی چې په دې اړه څه واوري او هیله من دی چې دا مسئله حل شي.
ټرمپ زیاته کړې وه، په اوس وخت کې هېڅوک نه پوهېږي چې څه پېښ شوي، خو بد خبرونه ډېر اورېدل کېږي، زما دا نه خوښېږي.
د فرانس پرېس خبري اژانس د راپور له مخې دا مسئله ښایي د ټرمپ له ادارې سره چې تر اوسه یې د یمن په جګړه کې د سعودي عربستان له خوا له بشري حقونو څخه د سرغړونو پر ادعاوو سترګې پټې کړې، د سعودي د ولیعهد شهزاده محمد بن سلمان نږدې اړیکې، چې په دې وروستیو کې یې ټینګې کړې، زیانمنې کړي.
