پاکستانۍ کلدارې تاریخي کم ارزښتوب تجربه کړ

د پاکستان له جوړېدو راهیسې د دې هېواد د پولي واحد (پاکستانۍ روپۍ) ارزښت تر ټولو ټيټې کچې ته رالوېدلی دی. په ۲۴ ساعتونو کې د یو امریکايي ډالر په وړاندې د پاکستاني روپیو په ارزښت کې لس روپۍ کمی راغلی دی. د دوشنبې په ورځ یو ډالر په ۱۲۴ پاکستانیو روپیو بدلېده، خو د سې شنبې په ورځ بیا یو ډالر په ۱۳۴ روپیو بدل شو. دې مسئلې د پاکستان نوی حکومت سخت اندېښمن کړی دی. عمران خان وايي د خپل هېواد د اقتصادي ثبات ساتلو ته د پيسو له نړیوال صندوق پور اخلي. هغه د خپل حکومت اړوندو چارواکو ته لارښوونه کړې چې په دې اړه د پیسو له نړیوال بانک سره خپل مذاکرات پیل کړي. تر دې مخکې ځینو نړیوالو بانکونو ویلي وو، چې پاکستان ته به پور نه ورکوي. عمران خان هم د خپل حکومت په پیل کې ویلي وو، چې دی به پاکستان پوروړی نه کړي بلکې هڅه به وکړي چې شته پورونه خلاص کړي.