د ایران ولسمشر حسن روحاني ويلي چې هېواد به یې د خپلو ملي ګټو لپاره له هرې وسیلې کار واخلي.
روحاني ویلي چې ایران باید له اقتصادي او پوځي پلوه ځواکمن وي. هغه زیاته کړې چې هېواد یې له پراختیا پرته بله هېڅ لار نه لري او د دغه هېواد حکومت به د خپلو خلکو د ستونزو د حل لپاره له هېڅ ډول هڅو مخ وا نه ړوي.
روحاني ویلي: «زه باورمن یم چې د هېواد د ملي ګټو لپاره مو له هرې وسیلې کار واخیستل شي او که چېرې زه پوه شوم چې یوې غونډې ته ولاړ شم او له چا سره ووینم، چې زما هېواد ابادېږي او د خلکو ستونزې حلېږي، زه به دریغ ونه کړم. اصل زموږ د ملت ملي ګټې دي».
دا څرګندونې په داسې حال کې کېږي، چې پر تهران د واشنګټن سخت بندیزونه وضع شوي دي.
له دې سره هممهاله د امریکا ولسمشر ډونالډ ټرمپ چې د جي- اووه سازمان غونډې د ګډون لپاره فرانسې ته تللی، ويلي چې امریکا د ایران د رژیم د بدلون غوښتونکې نه ده، بلکې غواړي چې ایران پر یوه شتمن هېواد بدل شي.
ټرمپ ویلي: «زه واقعاً د یوه ښه او ځواکمن ایران غوښتونکی یم. موږ نه غواړو چې د ایران رژیم بدلون وکړي، تاسو لیدلی چې هغوی په تېرو شلو کلونو کې څه ډول کار کړی، یعنې ډېر ښه نه و، راځئ چې اجازه ورکړو، دغه هېواد شتمن شي، راځئ چې هغوی ته ووایو چې ښه کارونه تر سره کړي».
د روحاني دا څرګندونې داسې مهال دي چې په فرانسه کې د جي- اووه سازمان له غونډې سره هممهاله د ایران د بهرنیو چارو وزیر جواد ظریف هم د اروپايي هېوادونو له ځينو مشرانو سره لیدلي دي.
بلخوا د جرمني لومړۍ وزیرې انګلامېرکل د ایران د بهرنیو چارو وزیر خبرې ښې او جوړوونکې بللې دي.
د یادونې ده چې د واشنګټن او تهران اړیکې وروسته له هغې ترینګلې شوې، کله چې د ټرمپ په مشرۍ د امریکا حکومت په ۲۰۱۸ ز کال کې له ایران سره د نړیوالو پیاوړو هېوادونو له شوي اټومي تړونه ووت او پر دغه هېواد یې نوي بندیزونه ولګول.
