وروستیو څېړنو ثابته کړې چې تور پوستي او لاتیني نژاد لرونکي، د سپین پوستو په پرتله ډېر د الزایمر پر ناروغۍ اخته شوي او اخته کېدای شي. د څېړنو له مخې، دغه توپیر د وینې په لوړ فشار، د شکرې ناروغۍ په درلودو او د ژوند په تګلارې پورې تړلی دی. په امریکا کې هر کال ۲۲۶ میلیونه ډالر پر الزایمر ناروغۍ د اخته کسانو پر پالنه لګېږي، چې ۱۵۴ میلیونه ډالر یې د روغتیایي بېمې له لارې پرې کېږي.
په منځني ډول هغه کسان چې پر دې ناروغۍ اخته شي، له اتو تر لسو کلونو پورې ژوند کولی شي. دا چې دغه ناروغي په ډېرې چټکۍ سره د ودې په حال کې ده، د معلوماتو له مخې تر ۲۰۵۰ ز کال پورې به په ټوله نړۍ کې په هرو ۳۳ ثانیو کې پر الزایمر ناروغۍ د یوه کس د اخته کېدو چانس موجود وي.
د شمېرو له مخې، اوسمهال په ټوله نړۍ کې ۳۶ میلیونه کسان پر دې ناروغۍ اخته دي. دې شمېرو ته په کتو به تر ۲۰۳۰ ز کال پورې ۶۶ میلیونه کسان د دې ناروغۍ په جال کې راګېر شي.
