په داسې حال کې چې په منځني ختیځ کې کړکېچ ورځ تر بلې د پراخېدو په حال کې دی، د فرانسې ولسمشر ایمانوېل مکرون خپل ایراني سیال حسن روحاني ته ویلي دي چې له زغم څخه کار واخلي.
د فرانسې د جمهوري ریاست دفتر په یوه بیان کې ویلي، مکرون پر روحاني غږ کړی چې د ایران په ملاتړ حوثي یاغیان دې په یمن کې د جګړې د ختمولو لپاره خبرو ته وهڅوي.
بیان د مکرون له قوله زیاته کړې چې تهران باید په لبنان کې هم له خورا زیات زغم څخه کار واخلي، څو په سیمه کې پراخېدونکی کړکېچ په اوسني حالت کې د دې سیمې ثبات زیانمن نه کړي.
دا په داسې حال کې ده چې د لبنان په شاوخوا کې له څو اونیو راهیسې اسرايیل او ایراني تحرکاتو دا دواړه پخواني دښمنان یوه ښکاره وسله وال تقابل ته نږدې کړي دي.
بلخوا د امریکا متحده ایالتونه پر ایران تور لګوي چې په یمن کې د حوثي یاغیانو او په لبنان کې د شیعه حزب الله ډلې په ګډون، په سیمه کې د تروریستي ډلو ملاتړ کوي، خو ایران بیا بیا دغه تورونه رد کړي دي.
د مکرون دفتر په بیان کې همدا راز راغلي، چې نوموړي په ټليفوني خبرو کې پر روحاني فشار راوړی چې د نړۍ له پیاوړو هېوادونو سره د ۲۰۱۵ ز کال اټومي هوکړې ته ژمن پاتې شي.
د فرانسې ولسمشر ایمانوېل مکرون چې غواړي د ایران او امریکا ترمنځ په روان کړکېچ کې د منځګړي رول ولوبوي، مخکې له دې یې د امریکايي او ایراني مشرانو د غونډې د جوړولو هڅه هم کړې ده.
هغه ویلي چې له اوسنیو هڅو څخه یې موخه له ایران سره د شپږو پیاوړو قدرتونو د اټومي موافقې ژغورل دي.
په ورته وخت کې د فرانس پرېس خبري اژانس د راپور له مخې، روحاني خپل فرانسوي سیال ته خبرداری ورکړی چې که اروپایي هېوادونه خپلې کړې ژمنې عملي نه کړي، نو د تهران راتلونکی اقدام به دا وي چې د خپل اټومي پروګرام د محدودولو په تعهداتو کې نور کموالی راولي.
د یادونې ده چې د ایران او امریکا ترمنځ روان کړکېچ هغه مهال مخ پر زیاتېدو شو، چې ولسمشر ټرمپ د تېر کال په مې میاشت کې له دغه تړونه د امریکا وتل اعلان کړل.
په بیان کې دغه راز راغلي چې روحاني مکرون ته ویلي چې له دې هوکړې په یو اړخیز ډول د امریکا تر وتلو وروسته اروپايي هېوادونو د ضمانت کوونکو په توګه د خپلو ژمنو د عملي کولو په برخه کې هېڅ مشخص اقدام نه دی کړی.
