د جرمني ولسمشر د پولنډ په ویلون ښار کې د تاریخ د خونړي ناورین له امله د دغه هېواد له خلکو بښنه غوښتې.
د جرمني ولسمشر فرانک والټر شټاین مایر چې له خپل پولنډي سیال اندژی دودا سره یو ځای د پولنډ ویلون ښار ته تللی و، د دغه ښار خلکو ته یې په خطاب کې ویلي چې د ویلون ښار د قربانیانو پر وړاندې د درناوي په دود سر ټیټوي او د بښنې غوښتونکی دی.
نوموړي ویلي: «زه ستاسې پر وړاندې ولاړ یم، څوک چې ژوندي پاتې دي، د وژل شویو وارثینو، سپین ږیرو، ځوانانو او د ویلون اوسېدونکو، زه د مننې او شرمندهګۍ په حالت کې ستاسې پر وړاندې ولاړ یم، زه د پولنډ په قربانیانو د جرمني د ظلم له امله دوی ته د درناوي په دود سر کښته کوم او بښنه غواړم».
په ورته وخت کې د پولنډ ولسمشر اندژي دودا پر پولنډ د المان د نازيانو برید یو وحشیانه عمل بللی او په کلکه یې غندلی دی.
ده ویلي، دوی نه شي کولی چې دویمه نړیواله جګړه هېره کړي، که څه هم د دې جګړې شاهدان اوس نشته، خو دا ترخې خاطرې باید خوندي شي، څو دا ډاډ تر لاسه شي چې په دویمه نړیواله جګړه کې چې په ویلون او د پولنډ په نورو ښارونو کې او ورڅخه بهر کومې پېښې چې رامنځته شوې، نه تکرارېږي.
د یادونې ده چې په دویمه نړیواله جګړه کې د دریو ميلیونو یهودیانو په ګډون، شپږ ميلیونه پولنډیان هم ووژل شول چې د یادې جګړې ټول تلفات ۵۰ ميلیونو کسانو ته رسېدل.
دا په داسې حال کې ده چې شټاین مایر او د نورو حکومتونو او دولتونو مشران پولنډ ته د دویمې نړیوالې جګړې د پیل د ۸۰یمې کلیزې یادغونډې ته ورغلي وو.
د امریکا د ولسمشر مرستیال مایک پېنس د پولنډ خلک وستایل او ویې ویل چې د پولنډ د خلکو شخصیت، اعتقاد او ژمنې دا خلک متفاوت ګرځولي او ټینګار یې وکړ چې امریکا او پولنډ له خپلو نورو متحدانو سره د دفاع په برخه کې د یو بل تر څنګ ولاړ دي.
پېنس دا هم ویلي چې امریکا د خپلو متحدانو په غوښتنه، د خپلو ژمنو د تر سره کولو لپاره پر دفاعي برخه ټینګار کوي.
ټاکل شوې وه چې په دغه غونډه کې د امریکا ولسمشر ډونالډ ټرمپ ګډون وکړي، خو نوموړي د دوریان په نوم د توپان له امله چې د امریکا د سواحلو پر لور په حرکت کې دی، خپل سفر لغوه او مرستیال یې دغې غونډې ته لېږلی.
د یادونې ده چې د ۱۹۳۹ ز کال د سپټمبر په لومړۍ د المان د نازیانو لخوا د پولنډ اشغال د دویمې نړیوالې جګړې پیل و.
