ټکنالوژۍ د انسانانو په ژوند کې ډېر سهولتونه رامنځته کړي او په مرسته یې نړۍ ورځ تر بلې ګام پر ګام د پرمختګ پر لور روانه ده او دا لړۍ همداسې دوام لري. د ټکنالوژۍ پوهان او عالمان په خپل منځ کې په رقابت دي چې یو له بله مخکې شي او د انسانانو ژوند ته نوې اسانتیاوې او سهولتونه راوړي؛ نو همدا د سالم رقابت ثمره ده چې د انسانانو ژوند یې جالب او په زړه پورې کړی دی.
په پخوا زمانو کې به انسانانو د سورلۍ، تجارت او کروندو لپاره له څارویو ( اوښانو، خرو، فیلانو، اسونو، غوایانو او…) څخه ګټه اخیستله، خو نن ورّځ انسانانو د ژوند د اسانتیا لپاره داسې وسایل او شیان جوړ کړي چې د ژوند اوږد مزل یې ډېر را لنډ کړی او د څارویو پرځای یې له ټکنالوژۍ څخه کار اخلي. موټرسیکل، تراکتور، موټر، جيټ الوتکې او تېز رفتاره اورګاډي جوړشوي.
پخوا به مسافرو ته د حال او احوال لپاره لیکونه لېږل کېدل چې په رسېدو به یې میاشتې او کلونه تېرېدل. وروسته بیا لږ پرمختګ وشو چې د ټایپونو او کېسټو زمانه راغله. دا زمانه د هغه وخت یوه پرمختللې او خوندوره زمانه وه چې کورنۍ به خپلو مسافرو ته د کورنۍ د حال احوال پکې د کورنۍ د غړو له خولې بیاناوه. دواړو لورو به د کېسټې له ډکولو او اورېدلو څخه خوند اخیست. د کېسټې لېږل هم د ليکونو په څېر ډېر وروسته یو او بل لوري ته رسېدل. تاسو به لیدلي وي چې کېسټې به په کورونو کې ډېر وخت ساتل کېدې چې وخت په وخت به د کورنۍ د غړو له خوا اورېدل کېدې. ټیپونه هم دومره اسان( عام) نه وو چې د هر چا او هر غریب په کور کې به پیدا شوي وای؛ یوازې به د کلي خان(ملک) او یا د کلي په شتمنه کورنۍ کې پیدا کېدل. که له دې هم راتېر شو، د ګرځنده موبایلونو(ټلیفونونو) وخت راغی. دغه موبایلونه هم بیا ډېر ژر تر هرې کورنۍ ورسېدل او ان په کورنۍ کې نږدې هر وګړي ورته لاسرسی درلود چې دا بیا د دغه عصر یو جالب او په زړه پورې د وګړو یو نښلوونکی سیسټم و چې د هرې مور او پلار او کورنۍ د ټولو غړو تر غوږو یې د مسافرو تازه احوال را رساوه.
اوس څه کېږي، پوهېږی چې د نړۍ له هرګوټ ګوټ څخه په ژوندۍ بڼه مخامخ یوله بل سره ګورو او د خپل ژوند ستونزې، مشکلات، پرمختګونه او ټول هغه څه ډېر په اسانۍ سره په ډېر جالب ډول یو له بل سره وایو. هر څه مو چې زړه غواړي وایو یې. موږ پوهېږو چې نړۍ ورځ تر بلې د پرمختګ او انکشاف پر لور روانه ده.
ټکنالوژۍ د انسانانو ژوند ډېر اسانه کړی او انسانان یې ډېر مخکې بېولي دي. که انسانانو د ژوند د پرمختګ او هوساینې لپاره کار نه وی کړی، غفلت یې کړی وای؛ نو نن به موږ له زیاتو ستونزو سره لاس او ګرېوان وو، ژوند او د ژوند چارې به مو په ډېرې ګرانۍ سره مخکې تللې.
په لنډ ډول، نن چې زموږ په کورنو کې کومه روښنایې تر سترګو کېږي، همدا د ټکنالوژۍ برکت دی .
ما هم په دې برخه کې تر خپلې وسې کار کړی، څو بشریت ته یو کوچنی خدمت وکړم. داسې یوه زانګو مې جوړه کړې چې د ماشوم په ژړا سره اتومات وزانګي، څو ماشوم ویده شي. کله چې ماشوم ویده شي، تر لسو دقیقو زانګو همداسې زانګي، وروسته تر لسو دقیقي زانګو خپله اتومات درېږي چې د مور او ماشوم په ژوند کې یو لوی سکون او راحت دی. د دې ترڅنګ داسې نور خدمات هم لري، څو د ماشوم ښه پالنه او روزنه وکړي. لکه د ماشوم د وزن اندازه کول او د ماشوم د قد اندازه کول. پر دې سربېره هره مور کولی شي چې ماشوم ته د خوب سندرې په خپل غږ کې ثبت کړي. کله چې ماشوم ژاړي، نو زانګو د مور ثبت شوی اواز ماشوم ته اوروي. د دې لپاره چې ماشوم د یوازېتوب احساس ونه کړي او په ارامۍ سره بېرته ویده شي؛ غواړم نور هم په دې کار وکړم. تر دې چې د ماشوم صحت معلوم کړي.
دا د ټکنالوژۍ برکت دی چې نن د نړۍ له ګوټ ګوټ سره یو ځای یو، یو د بل حال او احوال اخلو او د یو بل ستونزو او مشکلاتو ته په شریکه د حللارې چارې ګورو چې دا د بشریت لپاره یو لوی خدمت دی.
