الکوزی ګروپ دا وار په مخابراتي سکتور کې پانګونه کوي

په افغانستان کې یو لوی خصوصي شرکت دا ځل په مخابراتي برخه کې پانګونه کوي. د مخابراتو وزارت او ارګ له مطبوعاتي دفترونو په بېلو بېلو خپرو شويو خبرپاڼو کې راغلي چې الکوزی خصوصي شرکت دا ځل د مخابراتو برخه کې پانګونه کوي او د وصل تلیکام کمپنۍ یې پېرلې ده. ارګ ویلي پر الکوزي شرکت د وصل تلیکام کمپنۍ د پلور طرحه د وزیرانو شورا له لوري تایید شوې ده او یاده کمپنۍ به په تدریجي توګه الکوزي شرکت ته سپارل کېږي. د مخابراتو وزیر شهزاد اریوبي بیا وایي، چې دا یو نیک ګام دی، ځکه په دې توګه به یوه مخابراتي کمپنۍ افغان شرکت ته سپارل کېږي او دغه شرکت به په یاده کمپنۍ کې پراخ بدلونونه راولي. وزیر زیاته کړې چې الکوزی شرکت پر دغه کمپنۍ درې سوه میلیونه ډالره پانګونه کوي او د یادې کمپنۍ ټول خدمات به د نړۍ له اوسنیو معیاري مخابراتي خدماتو سره یو شان شي. د مخابراتو د وزیر په خبره وصل تلیکام کمپنۍ پوروړې وه نو ددې وړتیا یې نه لرله چې خپل پورونه پرې کړي، نو ځکه حکومت پرېکړه وکړه چې هغه پر یوه خصوصي شرکت وپلوري.