فاریاب نه مزار ته کډه شوې کورنۍ بېړنیو مرستو ته اړتیا لري

فارياب نه له وروستيو جګړو مزارشريف ښار ته را کډه شوې کورنۍ له سختو ستونزو سره مخ دي او بېړنيو مرستو ته اړتيا لري. یادې کورنۍ چې د مزارشريف ښار په يوه دښته کې بې سرپناه او خېمو کې ژوند کوي، زياتوي چې د خوړو لپاره هېڅ نه لري، دغه راز د يخنۍ له ګواښ سره مخ دي. بلخوا د بلخ د کډوالو او راستنېدونکو چارو رياست مسوولين هم مني چې وروستيو اونيو کې له فارياب نه لسګونه کورنۍ مزارشريف ښار ته ورکډه شوې دي. د دوی په خبره، له بېځايه شوو کورنيو سره د لومړنیو توکو د مرستو په موخه يې د هغوی سروې پيل کړې ده. د جګړو له امله دغه بېځايه شوې کورنۍ له حکومته د مرستې غوښتنه کوي. دا په داسې حال کې ده چې د تازه راپورونو له مخې سږ کال په افغانستان کې د ناامنیو له امله د بې ځایه شویو کورنیو شمېر خورا لوړ شوی او که ورسره بېړنۍ مرستې ونه شي نو له ګڼو ستونزو سره به مخ شي.