معصوم ستانکزی: د جنرال رازق د ترور د پيښې دوسیه بشپړه شوې ده

د هېواد د ملي امنیت عمومي رییس محمد معصوم ستانکزی وایي، د جنرال رازق ترور د سیمې د استخباراتو کار و. نوموړي چې نن یې د ولسي جرګې غونډې ته خبرې کولې وویل، د جنرال رازق ترور یواځې د طالبانو کار نه، بلکې په دې ترور کې د سیمې استخباراتو هم لاس درلود. هغه که څه هم د کوم هېواد نوم وانخیست خو په ورته ډېریو قضیو کې ګوته پاکستان ته نیول کېږي. هغه وویل چې د جنرال له وژل کېدو وروسته طالبانو د نوموړي د قتل پړه پر غاړه واخیسته خو وروسته یې بیرته انکار وکړ. ستانکزي دغه راز وویل، چې اوسمهال طالبانو دیني او ټولنیز مشرعیت له لاسه ورکړی دی او د هغوی پر وړاندې باید د جګړې په ډګر کې جدي برخورد وشي. هغه زیاته کړه چې د دې ډلې پر وړاندې په سیمه ییزه کچه اجماع رامنځته شوې او د هغوی موقف د پخوا په پرتله خورا کمزوری شوی دی. ستانکزي دغه راز وویل، د جنرال رازق په ترور کې ښکېل کسان پېژندل شوي او دا دوسیه له امنیتي اړخه په ټولییزه توګه بشپړه شوې ده. د یادونې ده چې جنرال رازق په کندهار ولایت مقام کې په داسې حال کې د والي د یو ساتونکي په برید کې ووژل شو، چې هلته کلک امنیتي تدابیر هم نیول شوي و.