پخوانی طالب چارواکی: افغان حکومت د سولې راتګ ته اراده نه لري

پخوانى طالب چارواکی سيد اکبر اغا تور پورې کوي چې افغان دولت د سولې راتګ لپاره رښتينې اراده نه لري. پخواني طالب چارواکي او د خلاصون لارې شورا مشر اکبر اغا چې په خوست کې یې د ديني عالمانو او قومي مشرانو يوې غونډې ته خبرې کولې وويل، کومې هڅې چې افغان دولت د سولې لپاره پيل کړې دي، نمايشي بڼه لري او تردې دمه يې کومه مثبته پايله نه ده ورکړې. هغه وايي، تر هغه چې امريکا د افغانستان لپاره په جوړه شوې ستراتيژي کې بدلون را نه ولي او د سولې په برخه کې رښتینی چلند ونه کړي، د هغوی ټولې هڅې بې معنى دي. سيداکبر اغا د طالبانو د قطر له سياسي دفتر سره، له ګوانتانامو زندانه د خوشې شویو پنځو مهمو طالب مشرانو يو ځای کيدل نېک ګام ياد کړی دی. دا په داسې حال کې ده چې حکومتي مشران او سولې عالي شورا تل وايي چې په هېواد کې یې د سولې د راتګ لپاره اړينې هلې ځلې کړې دي.