د ملي امنیت ريیس وايي، د کندهار پر امنیې قوماندان جنرال عبدالرازق او د ولسي جرګې پر غړي عبدالجبار قهرمان د بريدونو د څرنګوالي په اړه به بشپړ معلومات ډېر ژر له خلکو سره شریک کړي.
د ملي امنیت ريیس معصوم ستانکزی وايي، د دوی د موندنو له مخې، د کندهار او هلمند په ورستیو خونړیو پېښو کې د سیمې استخباراتو لاس درلود.
ستانکزي دا څرګندونې پرون د ولسي جرګې استماعیه غونډې ته وکړې او ويې ویل: «موږ په خپلو څېړنو کې ښه پرمختګ لرو چې د پېښې اصلي ځای ته يې نږدې کړي یو، کسان مشخص شوي دي، دا کس څوک و، کورنۍ او هغو کسانو چې ده ته یې روزنه ورکړې او دی یې دلته رسولی او څنګه یې راوستی، د پېښې ټول جریان له تخنیکي امکاناتو په استفادې بشپړ شوی دی.»
ستانکزي دغه راز وویل چې تر اوسه د کندهار د امنیه قوماندان د وژنې په تړاو ۲۲ تنه نیول شوي او تر څېړنو لاندې دي.
د ملي امنیت ريیس وايي، د دوی څېړنې ښيي چې د جنرال رازق د وژلو طرحه د سیمې د استخباراتو په همکارۍ جوړه شوې وه.
په ورته وخت کې د کورنیو چارو وزیر ویس احمد برمک غونډې ته په خپلو خبرو کې وویل چې پولیسو په دیارلسو پړاوونو کې د کندهار د امنیه قوماندان د وژل کېدو د قضیې په تړاو خپلې څېړنې وکړې او مدارک او شواهد یې د ملي امنیت ریاست په واک کې ورکړل.
شاوخوا دوه اونۍ مخکې د کندهار پخوانی امنیه قوماندان ستر جنرال عبدالرازق اڅکزی او د نوموړي ولایت د ملي امنیت پخوانی ريیس مومن حسین خېل د کندهار د والي په دفتر کې په نښه او ووژل شول.
تر دې پېښې مخکې د ولسي جرګې لپاره له هلمند ولایته کاندید عبدالجبار قهرمان د هلمند په مرکز لښکرګاه کې په خپل کار ځای کې ووژل شو.
د ولسي جرګې دويم مرستیال امیرخان یار چې د غونډې مشري یې کوله، له امنیتي مسوولینو وغوښتل چې په یادو پېښو کې ښکېل کسان مجازات کړي.
ده وویل: «موږ داسې نه شو کولای چې اتلان مو وژل کېږي او مونږ غلي کېنو، زمونږ غوښتنه له تاسې دا ده چې د یادو پېښو عاملین باید د خپلو اعمالو سزا وویني، دا چې په دې تړاو د امنیتي او کشفي ارګانونو ضعف و، نور موارد یا د بهرنیانو لاس باید ټول خپله سزا وویني.»
د ملي دفاع وزیر طارق شاه بهرامي هم یادې غونډې ته په خبرو کې وویل چې د ملي امنیت په ګډون د نورو امنیتي ارګانونو په همکارۍ د کندهار او هلمند د پېښو په تړاو جدي څېړنې روانې دي او هیله یې وښوده چې تر لاسه شوي نتایج به د خلکو قناعت خپل کړي.
