ولسمشر غني يو ځل بيا پر طالبانو غږ وکړ چې بین الافغاني مذاکراتو ته چمتو شي، ځکه حکومت د سولې واک پرديو ته نه ورکوي.
دغه څرګندونې ولسمشر غني د پکتيکا له قومي مشرانو او ديني عالمانو سره د لېدنې پر مهال د پکتيکا په مرکز ښرنه کې وکړې.
ولسمشر زياته کړه چې له سیاسي اړخه د سولې زمینه برابره شوې او اسلامي نړۍ او سیمه سولې ته چمتو ده.
ده وويل چې افغانستان له پاکستان سره سوله غواړي او پاکستان باید په دې پوه شي چې باثباته افغانستان د دوی په ګټه هم دی.
ولسمشر وویل: «طالبان دې بین الافغاني مذاکراتو ته چمتو شي، ځکه چې موږ د سولې اختیار پردیو ته نه ورکوو.»
غني تېرو ټاکنو ته په اشارې سره وویل چې د خلکو ونډه د قدر وړ ده او د ټاکنو دواړه کمېسیونونه روڼتيا ته ژمن دي او د ولس د ارادې درناوی به وکړي.
ولسمشر له امنیتي او دفاعي ځواکونو سره په همکارۍ کې د پکتیکا د ولس رول اغېزناک وباله او د دغه رول پر لا پیاوړتیا یې ټینګار وکړ.
غني وویل چې د پکتیکا ولایت قومي جوړښت، یووالی او همغږي پیاوړې ده او باید په یوه داسې طرحه کار وشي چې د امنیت له ټينګښت سره مرسته وکړي. ولسمشر محمد اشرف غني پرون سهار د يو لوړپوړي دولتي پلاوي په مشرۍ پکتيکا ولايت ته سفر وکړ.
