پخوانى طالب چارواکی او د خلاصون لارې شورا مشر سيد اکبر اغا وايي چې افغان دولت د سولې د ټينګولو لپاره رښتينې اراده نه لري.
هغه چې پرون يې په خوست کې د ديني عالمانو او قومي مشرانو يوې غونډې ته خبرې کولې وويل، کومې هڅې چې افغان دولت د سولې لپاره پيل کړې دي، نمايشي بڼه لري او تر دې دمه يې کومه مثبته پايله نه ده ورکړې.
نوموړي غونډې ته په خبرو کې د سولې په عالي شورا هم نيوکه وکړه او ويې ويل چې دا يوه دولت پلوې شورا ده او د سولې د راوستلو واک او اختيار نه لري.
اکبر اغا زياته کړه: «د سولې شورا دومره وخت تېر شو او هر غړی يې زرګونه ډالر معاش اخلي، خو د سولې راتګ لپاره يې ډېر لږ کار هم نه دی کړی، ځکه دوی په دې باور دي که چېرې په هېواد کې سوله راشي، نو دا معاش بيا له منځه ځي.»
دغه پخوانى طالب چارواکی د افغان سولې په برخه کې د امريکا د ځانګړي استازي زلمي خليلزاد کار ته هم د شک په سترګه ګوري.
هغه وايي، تر هغه چې امريکا د افغانستان لپاره په جوړه شوې ستراتيژۍ کې بدلون را نه ولي او د سولې په برخه کې صادقانه چلند ونه کړي، د هغوی ټولې هڅې بې معنى دي.
سيد اکبر اغا د طالبانو د قطر له سياسي دفتر سره، له ګوانتنامو زندان څخه د را خوشي شويو پنځو مهمو طالب مشرانو يو ځای کيدل نېک ګام ياد کړ.
نوموړی زياتوي چې په دې دفتر کې شامل کسان په طالبانو کې له پوره نفوذ څخه برخمن دي او په وينا يې کومه پرېکړه چې د قطر دفتر وکړي، د کوېټې شورا به يې ماته نه کړي.
هغه زياته کړه: «زه چې څومره طالبان پېژنم او وخت مې په کې تېر کړی، اوس د طالبانو د قطر دفتر د کوېټې له شورا قوي دی، ځکه د طالبانو ټول مهم کسان پکې شامل دي. نو اوس يو ځل بيا له خلکو سره د سولې يوه هيله پيدا شوې ده.»
د سيداکبر اغا دا څرګندونې په داسې حال کې دي چې حکومتي مشران او د سولې عالي شورا چارواکي تل په هېواد کې د سولې د راتګ لپاره د اړينو هلو ځلو خبره کوي.
