روسيې په پټه ځينو وتلو افغان سياستوالو ته بلنه ورکړې چې له طالبانو سره د مذاکرو لپاره د مسکو په غونډه کې برخه واخلي.
د افغانستان د سياستوالو په هغه ډله کې چې مسکو ته بلل شوې، پخوانى ولسمشر حامد کرزى هم شامل دى.
د رويټرز اژانس په حواله، په تېرو دوو مياشتو کې د دغه کنفرانس لپاره بلنه بيا بيا تمديد شوې ده.
د اژانس په حواله، په دې ډله کې د افغان رهبرانو همکاران او هغه مخکښ سياستوال هم شامل دي چې له افغان حکومت سره اړيکې لري.
رويټرز اژانس ليکلي چې په کابل کې د روسيې سفارت پر دې موضوع له تبصرې کولو ډډه وکړه.
روسيې په اګست مياشت کې په مسکو کې د سولې د څو اړخيزو مذاکرو پېشنهاد کړى و، ١٢ هېوادونو او د طالبانو استازو ته يې بلنه ورکړې وه چې په سپټمبر مياشت کې په دغو مذاکرو کې برخه واخلي.
خو د مسکو غونډه وروسته له هغې وځنډول شوه چې ولسمشر محمد اشرف غني وويل، له طالبانو سره هر ډول مذاکرې بايد د افغان حکومت په رهبرۍ وشي.
بل خوا د بهرنيو چارو وزارت وايي، د مسکو د غونډې په اړه يې له روسي چارواکو سره خبرې روانې دي.
د دغه وزارت وياند صبغت احمدي ازادي راډيو ته ويلي: «زموږ دريځ له لومړۍ ورځې مشخص و، موږ ويلي چې د مسکو غونډې د څرنګوالي په اړه بحث کوو، دا بحث روان دى، د دې غوندې د نېټې په اړه هم په خبرو بوخت يو چې يوې نتيجې ته ورسېږو.»
دغه راز د روسيې د بهرنيو چارو وزارت وياندې ماريا زخارووا ويلي، هيله منه ده چې د دغه کنفرانس جزيات په راتلونکو ورځو کې روښانه کړي.
هغې ويلي چې د دې غونډې نېټه او د ګډونوالو لېست په نهايي کېدو دى.
يوه افغان چارواکي رويټرز ته ويلي: «له موږ غوښتنه شوې چې د مسکو غونډه لغوه کړو، ځکه د بېلابېلو ډلو له خوا له طالبانو سره خبرې د افغانستان د سولې پروسه چې امريکا يې ملاتړ کوي، لا پېچلې کوي.»
د پخواني ولسمشر حامد کرزي وياند محمد يوسف سها بيا ويلي، کرزى به د مسکو په غونډه کې ځکه ګډون وکړي چې له طالبانو سره د سولې هر ډول خبرې بايد له پامه ونه غورځول شي.
د بلخ پخواني والي او د جمعيت ګوند يوه مشر عطامحمد نور هم ويلي چې د مسکو په غونډه کې به برخه اخلي.
رويټرز اژانس ليکي، په افغانستان کې د طالبانو مهمو غړو ويلي چې دوى به هم مسکو ته خپل يو هيئت ولېږي چې له ګاونډيو هېوادونو چين، ايران، پاکستان، تاجکستان، ازبکستان، ترکمنستان او نورو سره بحث وکړي.
دغو هېوادونو مخکې ويلي وو چې دې غونډې ته به خپل استازي ولېږي.
